الماتىدا بانك سەكتورى مەن ميكروقارجى ۇيىمدارىنىڭ وكىلدەرى قاتىسقان كەزدەسۋ بولىپ ءوتتى. وندا قازاقستان رەسپۋبليكاسىنىڭ جاڭا كونستيتۋتسياسى جوباسىنىڭ نەگىزگى ەرەجەلەرى تالقىلاندى. ءىس-شاراعا قاتىسۋشىلار الداعى رەفەرەندۋمنىڭ ماڭىزدىلىعىن اتاپ ءوتىپ، ەلدىڭ نەگىزگى زاڭىن جاڭارتۋدى ءبىراۋىزدان قولدايتىندارىن ءبىلدىردى.
قازاقستان رەسپۋبليكاسى قارجى نارىعىن رەتتەۋ جانە دامىتۋ اگەنتتىگىنىڭ ءتورايىمى ءمادينا ابىلقاسىموۆا قارجى سەكتورى ءۇشىن تۇراقتى ءارى بولجامدى قۇقىقتىق ورتا اسا ماڭىزدى ەكەنىن اتاپ ءوتتى.
ونىڭ ايتۋىنشا، قارجى قاۋىمداستىعى ۇسىنىلىپ وتىرعان وزگەرىستەردىڭ ماڭىزىن جاقسى تۇسىنەدى جانە مەملەكەت باسشىسى ۇسىنعان رەفورمالار باعىتىن، سونداي-اق جاڭا كونستيتۋتسيا جوباسىن قولدايدى.
«قارجى سەكتورى ءۇشىن قۇقىقتىق ورتانىڭ تۇراقتى ءارى بولجامدى بولۋى وتە ماڭىزدى. مەملەكەت باسشىسىنىڭ باستاماسىمەن قازاقستاندا جۇرگىزىلىپ جاتقان قولايلى بيزنەس-كليمات، ساياسي تۇراقتىلىق پەن دەموكراتيالىق رەفورمالار وسىنداي ينۆەستيتسيالىق ورتانى قالىپتاستىرۋعا مۇمكىندىك بەردى»، — دەدى ءمادينا ابىلقاسىموۆا.
ول سونداي-اق جۇرگىزىلىپ جاتقان رەفورمالاردىڭ ناتيجەسى ەلدىڭ جوعارى ينۆەستيتسيالىق رەيتينگتەرىنەن كورىنىس تاۋىپ وتىرعانىنا توقتالدى. قازاقستان حالىقارالىق ۇيىمدار مەن رەيتينگتىك اگەنتتىكتەردىڭ وڭ باعاسىن الىپ كەلەدى. بۇل حالىقارالىق ينۆەستورلار مەن حالىقتىڭ سەنىمىنىڭ جوعارى ەكەنىن كورسەتەدى.
قازاقستان قارجىگەرلەرى قاۋىمداستىعى كەڭەسىنىڭ ءتورايىمى ەلەنا باحمۋتوۆا كەزدەسۋگە قاتىسۋشىلاردىڭ الداعى رەفەرەندۋمدى تالقىلاۋعا ۇلكەن قىزىعۋشىلىق تانىتقانىن ايتتى. ونىڭ سوزىنشە، جيىنعا جينالعان ادامدار بەلسەندى تۇردە سۇراقتار قويىپ، ۇسىنىلىپ وتىرعان وزگەرىستەرگە شىنايى قىزىعۋشىلىق ءبىلدىردى.
«بۇگىن بەدەلدى سپيكەرلەر ءسوز سويلەپ، الداعى وزگەرىستەر تۋرالى ايتىپ بەردى. ادامداردىڭ ەلدەگى جاعدايعا الاڭدايتىنى جانە ءارى قاراي قالاي ارەكەت ەتۋ كەرەكتىگىن تۇسىنگىسى كەلەتىنى بايقالدى»، — دەدى ول.
ەلەنا باحمۋتوۆا مۇنداي كەزدەسۋلەر ازاماتتاردىڭ بەلسەندى ازاماتتىق ۇستانىمىن قالىپتاستىرۋعا ىقپال ەتەتىنىن ايتتى. ونىڭ پىكىرىنشە، تالقىلاۋعا قاتىسقانداردىڭ كوپشىلىگى رەفەرەندۋمعا مىندەتتى تۇردە قاتىسادى.
ء«بىز مەملەكەتىمىزدىڭ قۇقىقتىق نەگىزدەرى ەلەۋلى وزگەرىسكە ۇشىرايتىن شاقتا تۇرمىز. رەفەرەندۋمنان كەيىن كونستيتۋتسيالىق زاڭدارعا جانە باسقا دا نورماتيۆتىك اكتىلەرگە وزگەرىس ەنەدى»، — دەدى ول.
ءوز كەزەگىندە قازاقستان ميكروقارجى ۇيىمدارى قاۋىمداستىعىنىڭ توراعاسى ەربول ومارحانوۆ قارجى سەكتورى ەلدىڭ دامۋىنا باعىتتالعان باستامالاردى قولدايتىنىن ايتتى.
«ميكروقارجى ۇيىمدارى قاۋىمداستىعى، جالپى قارجى سەكتورى سياقتى، الەۋمەتتىك، ادىلەتتى ءارى قۋاتتى قازاقستاندى دامىتۋعا باعىتتالعان پرەزيدەنت ساياساتىن قولدايدى. ءبىز ازاماتتارىمىزدى جانە قارجى سالاسىنداعى ارىپتەستەرىمىزدى رەفەرەندۋمعا قاتىسىپ، ءوز ازاماتتىق ۇستانىمدارىن بىلدىرۋگە شاقىرامىز»، — دەدى ول.
«باعالى قاعازداردىڭ ورتالىق دەپوزيتاريى» اق باسقارۋشى ديرەكتورى ەرنست مۋسليمحانوۆ ازاماتتاردىڭ رەفەرەندۋمعا قاتىسۋى ازاماتتىق ۇستانىمنىڭ ماڭىزدى كورىنىسى ەكەنىن اتاپ ءوتتى.
ونىڭ ايتۋىنشا، ءبارى داۋىس بەرۋگە كەلىپ، ءوز پىكىرىن ءبىلدىرۋى كەرەك.
«ورتالىق دەپوزيتاري رەفەرەندۋمعا قاتىسادى. مەن ءوز وي-پىكىرىمدى ءبىلدىرىپ، داۋىس بەرۋىم كەرەك دەپ ەسەپتەيمىن»، — دەدى ول.
ەرنست مۋسليمحانوۆ سونداي-اق سپيكەرلەرمەن وتكەن كەزدەسۋ پايدالى بولعانىن ايتتى. سەبەبى قاتىسۋشىلار كونستيتۋتسيا جوباسىن ازىرلەۋگە قاتىسقان مامانداردان تىكەلەي تۇسىندىرمە الۋ مۇمكىندىگىنە يە بولدى.
«كونستيتۋتسيا جوباسىن ازىرلەۋدىڭ سەبەپتەرى تۋرالى العاشقى دەرەككوزدەن ەستىپ، بۇل وزگەرىستەردىڭ قازاقستانعا جانە ەلىمىزدىڭ ودان ءارى دامۋىنا قانداي اسەر ەتەتىنىن ءتۇسىنۋ وتە پايدالى بولدى»، — دەپ قوستى ول.
كەزدەسۋ قورىتىندىسى بويىنشا قاتىسۋشىلار رەفەرەندۋم وتكىزۋدى ءبىراۋىزدان قولداپ، ەلدىڭ بولاشاعىن ايقىندايتىن شەشىمدەردى قابىلداۋ بارىسىندا ازاماتتاردىڭ بەلسەنە قاتىسقانى اسا ماڭىزدى ەكەنىن اتاپ ءوتتى.
