قازاقستاننىڭ بۇرىنعى پرەمەر-ءمينيسترى اسقار مامينءنىڭ تۋىستارى ۇلىبريتانيا استاناسى لوندوندا قوماقتى قۇنى بار جىلجىمايتىن مۇلىككە يەلىك ەتەدى. بۇل تۋرالى «ۆىحود ك موريۋ» Telegram-ارناسى جازدى، دەپ حابارلايدى ادىرنا.
دەرەككە سايكەس، بۇرىنعى پرەمەردىڭ نەمەرە ىنىلەرى ەرنار مەن اليبەك ماميندەردىڭ لوندوندا جالپى قۇنى 15,7 ميلليون فۋنت ستەرلينگ بولاتىن ەكى پاتەرى بار. قازىرگى باعام بويىنشا بۇل شامامەن 10,4 ميلليارد تەڭگەدەن اسادى.
قۇجاتتارعا قاراعاندا، پاتەرلەردىڭ ناقتى باقىلاۋشىسى – ولاردىڭ اكەسى، اسقار ءماميننىڭ تۋعان اعاسى مارات مامين. ەرنار مەن اليبەك بۇل مۇلىكتى اكەسىنىڭ كەلىسىمىنسىز ساتا نەمەسە جالعا بەرە المايدى.
پاتەرلەر لوندوننىڭ بەدەلدى Bayswater اۋدانىندا ورنالاسقان. بۇل اۋماق كەنسينگتون باقتارى مەن گايد-پارك ماڭىنا جاقىن جانە پوستكەڭەستىك كەڭىستىكتەگى اۋقاتتى تۇلعالار اراسىندا تانىمال.
مۇندا قازاقستاندىق كاسىپكەرلەر ۆلاديمير كيم مەن ۆلاديمير نيءدىڭ وتباسىلارى دا جىلجىمايتىن مۇلىككە يە ەكەنى ايتىلعان. سونىمەن قاتار ولاردىڭ كورشىلەرى قاتارىندا ۋكراينالىق ميللياردەر رينات احمەتوۆ, كاسىپكەر دميتري فيرتاش, رەسەيلىك وليگارحتار ولەگ دەريپاسكا مەن دميتري رىبولوۆلەۆ بار.
مالىمەتكە سايكەس، مارات مامين 2014 جىلى Lancaster Gate كەشەنىنەن 8,7 ميلليون فۋنت ستەرلينگكە پاتەر ساتىپ العان. كەيىن بۇل مۇلىك ونىڭ كىشى ۇلى اليبەككە راسىمدەلگەن. ال 2021 جىلى سول عيماراتتان تاعى ءبىر پاتەر 7 ميلليون فۋنت ستەرلينگكە ساتىپ الىنىپ، ۇلكەن ۇلى ەرناردىڭ اتىنا جازىلعان.
دەرەكتەر بويىنشا، مارات مامين وتباسى مۇشەلەرىمەن بىرگە ۇلىبريتانيا ازاماتتىعىن العان جانە قازاقستان ازاماتتىعىنان رەسمي تۇردە باس تارتقان.
بۇعان قوسا، مارات ءماميننىڭ وتباسى باسقا ەلدەردە دە جىلجىمايتىن مۇلىككە يە ەكەنى ايتىلادى. اقش-تا ولار ورلاندو ماڭىندا كوتتەدجگە، ال مايامي ماڭىنداعى تۇرعىن ءۇي كەشەنىندە پاتەرگە يەلىك ەتەدى. سونداي-اق دۋباي قالاسىنداعى Al Bateen Residences كەشەنىندە قۇنى 1 ميلليون دوللاردان اساتىن پاتەر تىركەلگەن.
ال اسقار ءماميننىڭ وزىنە قاتىستى شەتەلدە قىمبات جىلجىمايتىن مۇلىك تىركەلمەگەنى ايتىلعان. قاڭتار وقيعالارىنەن كەيىن ول ساياساتتان شەتتەپ، قازاقستان حوككەي فەدەراتسياسىنىڭ باسشىسى قىزمەتىنە تاعايىندالعان.
