الماتىدا ازاماتتىق بەلسەندى، ساياساتتانۋشى سانجار بوقاەۆ ۇستالدى. بۇل تۋرالى باس پروكۋراتۋرا ايتتى، دەپ حابارلايدى «ادىرنا» ءتىلشىسى.
رەسمي دەرەككە سۇيەنسەك، ول قر قپك-ءنىڭ 128–131-باپتارىنىڭ تارتىبىمەن ۇستالعان.
«سانجار بوقاەۆ جالعان اقپارات تاراتۋ جانە قوعامدا تەرىس پىكىر قالىپتاستىرۋ ماقساتىندا الەۋمەتتىك جەلىلەردە جەكەلەگەن تۇلعالاردىڭ قوعامدىق ساياباق اۋماعىندا اعاشتاردى زاڭسىز كەسۋى جانە قۇرىلىس نىساندارىنان مۇلىك ۇرلاۋى تۋرالى بەينەماتەريالداردى ورنالاستىردى دەگەن كۇدىككە ءىلىندى»،-دەلىنگەن حابارلامادا.
تەرگەۋ دەرەكتەرىنە سايكەس، بەلسەندى اتالعان قىلمىستاردى ۇيىمداستىرىپ، قارجىلاندىرعان. ول ءۇشىن تابىسى تومەن ادامداردى تارتىپ، ولارعا اقشالاي سىياقى بەرۋ ارقىلى اعاش كەسۋ مەن ۇرلىق جاساۋعا تاپسىرما بەرگەن.
سونداي-اق ول اسا ءىرى مولشەردە قارجى قاراجاتىن الاياقتىق جولمەن جىمقىردى دەگەن كۇدىككە ىلىنۋدە.
وزگە اقپارات قر قپك-ءنىڭ 201-بابىنا سايكەس جاريا ەتۋگە جاتپايدى.
44 جاستاعى سانجار بوقاەۆ ءار جىلدارى الماتى قالالىق اكىمدىگىندە باسشىلىق ورىنداردا جانە ءبىر كەزدەگى "نۇر وتان" پارتياسىنىڭ قالالىق فيليالىندا قىزمەت اتقارعان. قازاقستاندا ءرۋلى وڭ جاق كولىكتەر داۋى كەزىندە، كەيىن ۋتيلالىمعا قارسى قوزعالىس كەزىندە بەلسەندىلىگىمەن كوزگە ءتۇستى. سوڭعى جىلدارى بيلىكتى قاتاڭ سىناپ، كەمشىلىكتەردى اشكەرە ەتىپ جۇرگەن. سوڭعى ايلاردا ونىڭ شەتەلگە وقۋعا كەتكەنى ايتىلعان.
