Almatyda azamattyq belsendı, saiasattanuşy Sanjar Boqaev ūstaldy. Būl turaly Bas prokuratura aitty, dep habarlaidy «Adyrna» tılşısı.
Resmi derekke süiensek, ol QR QPK-nıŋ 128–131-baptarynyŋ tärtıbımen ūstalǧan.
«Sanjar Boqaev jalǧan aqparat taratu jäne qoǧamda terıs pıkır qalyptastyru maqsatynda äleumettık jelılerde jekelegen tūlǧalardyŋ qoǧamdyq saiabaq aumaǧynda aǧaştardy zaŋsyz kesuı jäne qūrylys nysandarynan mülık ūrlauy turaly beinematerialdardy ornalastyrdy degen küdıkke ılındı»,-delıngen habarlamada.
Tergeu derekterıne säikes, belsendı atalǧan qylmystardy ūiymdastyryp, qarjylandyrǧan. Ol üşın tabysy tömen adamdardy tartyp, olarǧa aqşalai syiaqy beru arqyly aǧaş kesu men ūrlyq jasauǧa tapsyrma bergen.
Sondai-aq ol asa ırı mölşerde qarjy qarajatyn alaiaqtyq jolmen jymqyrdy degen küdıkke ılınude.
Özge aqparat QR QPK-nıŋ 201-babyna säikes jariia etuge jatpaidy.
44 jastaǧy Sanjar Boqaev är jyldary Almaty qalalyq äkımdıgınde basşylyq oryndarda jäne bır kezdegı "Nūr Otan" partiiasynyŋ qalalyq filialynda qyzmet atqarǧan. Qazaqstanda rulı oŋ jaq kölıkter dauy kezınde, keiın utilalymǧa qarsy qozǧalys kezınde belsendılıgımen közge tüstı. Soŋǧy jyldary bilıktı qataŋ synap, kemşılıkterdı äşkere etıp jürgen. Soŋǧy ailarda onyŋ şetelge oquǧa ketkenı aitylǧan.
