فوتو: forbes.kz
رەسەيدە قازاقستاندىق كاسىپكەر اناتولي بالۋشكينگە قاتىستى تاعى ءبىر سوت پروتسەسى وتەدى. تاسس حابارلاۋىنشا، ماسكەۋ اربيتراجدىق سوتى 2026 جىلعى 14 مامىرعا سوت وتىرىسىن بەلگىلەگەن. وندا كاسىپكەردى بانكروت دەپ تانۋ نەمەسە قارىزدارىن قايتا قۇرىلىمداۋ ماسەلەسى قارالماق، دەپ حابارلايدى "ادىرنا".
سوتقا جۇگىنگەن - كاسىپكەردىڭ بۇرىنعى جۇبايى يۋليا گۋزەەۆا. ول بالۋشكيننەن 572,8 مىڭ رۋبل (شامامەن 3,3 ملن تەڭگە) كولەمىندە اليمەنت ءوندىرىپ بەرۋدى تالاپ ەتەدى. سونىمەن قاتار، بۇل تالاپتى كرەديتورلار ءتىزىمىنىڭ ءبىرىنشى كەزەگىنە ەنگىزۋدى سۇراعان.
ايتا كەتەيىك، بۇعان دەيىن رەسەي سوتى گۋزەەۆاعا اليمەنت ءوندىرۋ قۇقىعىن بەرىپ، بۇل شەشىم زاڭدى كۇشىنە ەنگەن ەدى.
اناتولي بالۋشكين مەن قازاقستان بيلىگى اراسىنداعى داۋ 2020 جىلى باستالعان. سول كەزدە قازاقستان رەسپۋبليكاسى يندۋستريا جانە ينفراقۇرىلىمدىق دامۋ مينيسترلىگى (قازىرگى ونەركاسىپ جانە قۇرىلىس مينيسترلىگى) «ازيا اۆتو» كومپانياسىمەن جاسالعان ينۆەستيتسيالىق كەلىسىمدى سوت ارقىلى بۇزعان.
سوت شەشىمىمەن كومپانيا مەملەكەتكە 174 ملرد تەڭگە قايتارۋعا مىندەتتەلدى.
2023 جىلدىڭ جەلتوقسانىندا بالۋشكين "گيپەربورەي" ارناسىنا بەرگەن سۇحباتىندا رەسەي ازاماتتىعىن العانىن مالىمدەگەن. سونداي-اق قازاقستاندا وزىنە قاتىستى جاريالانعان ىزدەۋ تۋرالى پىكىر بىلدىرگەن.
2025 جىلدىڭ ناۋرىزىندا «احمات» ارنايى جاساعىنىڭ كومانديرى اپتي الاۋدينوۆ الەۋمەتتىك جەلىدە بالۋشكيننىڭ قاتىسۋىمەن تۇسىرىلگەن بەينەروليك جاريالادى. وندا كاسىپكەر «پلاستۋن» جول تالعامايتىن كولىگى تۋرالى ايتىپ، ونىڭ نوۆوسىبىردە وتاندىق ينجەنەرلەر تاراپىنان جاسالعانىن جەتكىزگەن. بۇل تەحنيكا قازىرگى تاڭدا رەسەيدىڭ كۇشتىك قۇرىلىمدارىندا سىناقتان ءوتىپ جاتىر.
2025 جىلدىڭ ساۋىرىندە وسكەمەن قالالىق سوتى بالۋشكيندى اسا ءىرى كولەمدەگى الاياقتىق بويىنشا كىنالى دەپ تانىدى. سوت وعان 9 جىل باس بوستاندىعىنان ايىرۋ جازاسىن تاعايىنداپ، سونداي-اق 9 جىل مەرزىمگە كوممەرتسيالىق ۇيىمداردا باسشىلىق قىزمەت اتقارۋ قۇقىعىنان ايىرعان.
