بانگلادەشتىڭ شىعىسىنداعى كوميللا وكرۋگى اۋماعىندا جەكسەنبى كۇنى ءىرى جول-كولىك وقيعاسى ورىن الدى. تەمىرجول وتكەلىندە پويىز بەن جولاۋشىلار اۆتوبۋسىنىڭ سوقتىعىسۋى سالدارىنان كەمىندە 12 ادام قازا تاۋىپ، تاعى 20-عا جۋىق ادام ءتۇرلى دەڭگەيدە جاراقات العان.
جەرگىلىكتى پوليتسيانىڭ مالىمەتىنشە، اپات تاڭعى ساعات 03:00 شاماسىندا سادار-داكشين شاعىن اۋدانىندا بولعان. چيتتاگونگ قالاسىنا باعىت العان پوشتا پويىزى تەمىرجولدان ءوتىپ بارا جاتقان اۆتوبۋسپەن سوقتىعىسقان.
وقيعا ورنىنا جەدەل جەتكەن قۇتقارۋشىلار زارداپ شەككەندەردى جاقىن ماڭداعى مەديتسينالىق كوللەدج اۋرۋحاناسىنا جەتكىزدى. دارىگەرلەر ولاردىڭ جاعدايىن باقىلاۋعا العان.
قازىرگى ۋاقىتتا اپاتتىڭ سەبەپتەرىن انىقتاۋ ماقساتىندا تەرگەۋ امالدارى جۇرگىزىلۋدە. بيلىك وكىلدەرى ارنايى بىرنەشە كوميسسيا قۇرىپ، وقيعانىڭ ءمان-جايىن جان-جاقتى تەكسەرۋگە كىرىسكەن.
تەمىرجول قىزمەتىنىڭ حابارلاۋىنشا، داككا–چيتتاگونگ باعىتى بويىنشا پويىز قوزعالىسى ۋاقىتشا توقتاتىلعان. كەيىن جولدار تازارتىلىپ، قاتىناس قايتا قالپىنا كەلتىرىلگەن.
