ءماجىلىس دەپۋتاتى ايدوس سارىم قازىرگى الەمدەگى ساياسي جانە اقپاراتتىق ۇردىستەرگە قاتىستى پىكىر ءبىلدىرىپ، الەۋمەتتىك جەلىلەردىڭ قوعامداعى رولىنە توقتالدى، دەپ حابارلايدى «ادىرنا» ءتىلشىسى.
ونىڭ ايتۋىنشا، بۇگىندە الەمدە ۋلترادەموكراتيالىق كوزقاراستاعى توپتاردىڭ دۇنيەتانىمىن تۇبەگەيلى وزگەرتىپ جاتقان ءىرى ترەندتەر قالىپتاسىپ كەلەدى.
«شىنى كەرەك، ءبىر كەزدەرى مەن الەۋمەتتىك جەلىلەردى جاڭا دەموكراتيانىڭ الاڭى بولادى دەپ ويلاعان ەدىم. بىراق ۋاقىت وتە كەلە ولار سول باياعى كۇيىندە ەكەنىن ءتۇسىندىم. الەۋجەلى ورىنسىز امبيتسيا، قىڭىرلىق، توزىمسىزدىك پەن جەككورۋشىلىككە تولى «بالالار الاڭى» بولىپ قالىپ وتىر. جەلىلەر باستاپقىدا بيزنەس رەتىندە قۇرىلدى، ولاردىڭ الگوريتمدەرى دە ءدال سول بيزنەسكە قىزمەت ەتەدى»،- دەدى دەپۋتات hronika.kz-كە بەرگەن سۇقباتىندا.
سارىمنىڭ پىكىرىنشە، الەۋمەتتىك جەلىدەگى ەڭ ادال توپ — ينفليۋەنسەرلەر.
«ولار وزدەرىنىڭ ءىس-ارەكەتىن اشىق تۇردە بيزنەس رەتىندە جۇرگىزىپ، سالىق تولەيدى. بىزدە بۇل زاڭمەن رەتتەلگەن، مەن دە وسى زاڭداردىڭ جاسالۋىنا قاتىستىم. قازىر بۇل بيۋدجەتكە ميللياردتاعان سالىق ءتۇسىمىن اكەلىپ وتىر. ال قالعان قولدانۋشىلار الەۋمەتتىك جەلىدە وتىرىپ لايك جيناي وتىرىپ، ءوزىن الەمدى باسقارىپ تۇرعانداي سەزىنۋى مۇمكىن. دەسە دە، شىن مانىندە ولار — يمپورتتىق ميللياردەرلەردىڭ ۇستەلىندەگى جاي عانا «شىرىگەن ەت». بۇل تۋرالى جۇزدەگەن كىتاپتار، عىلىمي زەرتتەۋلەر مەن ديسسەرتاتسيالاردا جازىلعان.
مادەنيەتكە، اسىرەسە ساياسي مادەنيەتكە كەلەتىن بولساق، ءبىز جاھاندىق ترەندتەرگە قاراما-قارسى فازادامىز. كەيبىر كەرى قۇبىلىستار بولماسا دا، ءبىز ساياساتتى ينستيتۋتسيوناليزاتسيالاۋ جولىمەن كەلە جاتىرمىز، اشىقتىق ينستيتۋتتارىن ەنگىزۋدەمىز. ال قازىرگى بيلىكتى قۇلاتۋعا تىرىساتىندار، كەرىسىنشە، مۇنداي جاڭاشىلدىقتاردى ءبىرىنشى بولىپ قولداۋى ءتيىس، بەلسەندى تۇردە قاتىسۋى كەرەك»،- دەدى دەپۋتات.
سونداي-اق ايدوس سارىم پىكىرتالاستىڭ ماڭىزدىلىعىنا توقتالىپ، دوسىم ساتپاەۆقا قاتىستى پىكىر ءبىلدىردى.
«پىكىرتالاسقا تۇسۋگە دايىنمىن، بىراق ازىرگە بۇل ماعان مۇلدە قىزىق ەمەس. پىكىرتالاس ويعا ازىق بەرىپ، ەكى تاراپتى دا دامىتۋى كەرەك. سونىمەن قاتا كىمنىڭ دۇرىس، كىمنىڭ بۇرىس ەكەنىن ايقىندايتىن، الدىن الا كەلىسىلگەن شىندىق پەن اقيقات ولشەمدەرى بولۋى ءتيىس. پىكىرتالاستار «بەندەر مەن كسەندزدەر» داۋىنا نەمەسە «قۇداي بار ما؟» دەگەن سۇراققا قاتىستى بولماۋى كەرەك. مەنىڭ ويىمشا، پارلامەنت تاراعانعا دەيىن جانە سايلاۋالدى ناۋقان باستالعانعا دەيىن قالعان بىرنەشە اي ىشىندە وسىنداي پىكىرتالاستاردى وتكىزۋگە باتىلى جەتەتىن، جەتكىلىكتى بەيتاراپ الاڭ تابىلسا، وتە جاقسى بولار ەدى. بىراق، تاعى دا قايتالايمىن، تاراپتار مويىندايتىن ەرەجەلەر، زياتكەرلىك كوماندالار جانە پايدالى تاقىرىپتار قاجەت. مەن، جالپى، دوسىم ساتپاەۆتىڭ ءوز ىڭعايلى ايماعىنان شىعىپ، كەز كەلگەن پارتيانىڭ ساياساتكەرى بولۋىن قالايمىن. ول الدەقاشان ساياساتتىڭ ىشىندە ءجۇر، بىراق ساراپشى مارتەبەسىنىڭ ارتىنا جاسىرىلىپ وتىر. ونىڭ كوپتەگەن پىكىرلەرى — ساياسي دوگمالار مەن كوزقاراستار، ناعىز ساياسي تالداۋ ەمەس. بۇل تۋرالى مەن بىرنەشە رەت ايتقانمىن جانە، مەنىڭشە، ول وزىنە بۇل شىندىقتى مويىندايدى»،-دەپ تولىقتىردى ول.
