رەسەيمەن شەكاراعا جاقىن ورنالاسقان اتىراۋ وبلىسىنىڭ قۇرمانعازى اۋدانىندا ۇشقىشسىز ۇشۋ اپپاراتىنىڭ سىنىقتارىنا ۇقساس زات تابىلدى. بۇل تۋرالى «اق جايىق» باسىلىمى جازدى، دەپ حابارلايدى "ادىرنا".
جەرگىلىكتى پوليتسيا دەپارتامەنتىنىڭ مالىمەتىنشە، بۇل دەرەك بويىنشا تەكسەرىس باستالدى. ماماندار قازىر ناقتى نە تابىلعانىن جانە ونىڭ قايدان كەلگەنىن انىقتاپ جاتىر.
«ۇشقىشسىز ۇشۋ اپپاراتىنىڭ بولشەكتەرىنە ۇقساس زاتتىڭ تابىلۋىنا بايلانىستى ۋاكىلەتتى قىزمەتتەرمەن بىرلەسىپ تەكسەرۋ شارالارى جۇرگىزىلۋدە. نىسان دالا ايماعىنان تابىلدى، ەشقانداي زاقىم مەن زارداپ شەككەندەر جوق. وقيعانىڭ بارلىق ءمان-جايى انىقتالۋدا»، – دەپ حابارلادى پوليتسيا دەپارتامەنتى.
ەسكە سالا كەتەيىك، جۋىردا باتىس قازاقستان وبلىسىندا ۇشقىشسىز ۇشۋ اپپاراتى (ۇۇا) تابىلعان بولاتىن. دروننىڭ سۋرەتى الەۋمەتتىك جەلىلەرگە تارالىپ كەتتى، بىراق قانداي اپپارات ەكەنى جانە كىمگە تيەسىلى ەكەنى ازىرگە بەلگىسىز.
بىلتىر كۇزدە باتىس قازاقستان ءوبلىسىنىڭ بورىلى اۋدانىندا بەلگىسىز درون جارىلىپ، قىزىلتال اۋىلىنىڭ تۇرعىندارى ءدۇر سىلكىندىرگەن ەدى.
ال جازدا ماڭعىستاۋ وڭىرىنە بەس درون قۇلاعان. سىرتقى ىستەر مينيسترلىگى سول كەزدە وقيعانىڭ ءمان-جايى انىقتالىپ جاتىر دەپ قىسقا قايىرعان ەدى، بىراق ناقتى ەشقانداي مالىمدەمە جاسالمادى.
