جەتىسۋ وبلىسىندا ءتارتىپ ساقشىلارى ۇلكەندەردىڭ قاراۋىنسىز كوشەدە جالعىز جۇرگەن ءبۇلدىرشىندى قۇتقارىپ قالدى. ەكى جاسار بالا ۇيىنەن بايقاتپاي شىعىپ كەتىپ، كولىك قوزعالىسى كوپ جولدىڭ جيەگىنە جەتكەن، دەپ حابارلايدى "ادىرنا".
وقيعا جەتىسۋ وبلىسىنداعى كەزەكتى تەكسەرىس كەزىندە بولعان. «بۇركىت 161» ەكيپاجىنىڭ قىزمەتكەرلەرى جول جيەگىندە جالعىز تۇرعان كىشكەنتاي بالانى بايقاپ، بىردەن كولىكتى توقتاتتى. ءتارتىپ ساقشىلارى بالانى قولدارىنا الىپ، جانىندا ەرەسەكتەردىڭ بار-جوعىن تەكسەردى. ول كەزدە «102» پۋلتىنە بالا جوعالعانى تۋرالى ەشقانداي حابارلاما تۇسپەگەن ەكەن.
كەيىنىرەك بەلگىلى بولعانداي، ءبۇلدىرشىن ءۇي ىشىندەگىلەرگە بىلدىرمەي دالاعا شىعىپ كەتكەن. اتا-اناسى بالانىڭ جوقتىعىن بىرنەشە مينۋتتان كەيىن عانا بايقاپ، دەرەۋ ىزدەۋگە كىرىسكەن.
«بۇل وقيعا بالا قاۋىپسىزدىگىنە بەيجاي قاراماۋدىڭ ماڭىزدىلىعىن تاعى ءبىر مارتە ەسكە سالادى. اتا-انالارعا قىراعىلىقتى جوعالتپاۋ قاجەت. ال پوليتسەيلەر ءۇشىن بۇل كۇندەلىكتى قىزمەتتىڭ ءبىر بولىگى. كەيدە جاي عانا زەيىن قويۋدىڭ ءوزى ۇلكەن اپاتتىڭ الدىن الۋعا كومەكتەسەدى»، — دەپ اتاپ ءوتتى پوليتسيا قىزمەتكەرلەرى.
