ءماجىلىس دەپۋتاتى ەرمۇرات باپي الەۋمەتتىك جەلىلەردە تاراعان تەرىس ءدىني اقپاراتتار پەن قاقتىعىستارعا قاتىستى پىكىر ءبىلدىردى، دەپ حابارلايدى «ادىرنا» ءتىلشىسى.
ول قارابايىر ءدىندارلاردىڭ ۇلتتىق ۇستانىمدى ءىرىتىپ جاتقانىن جەتكىزدى.
«ينتەرنەت پودكاستاردىڭ بىرىندە رەسمي ءدىني قۇرىلىمعا قاتىسى جوق الدەبىر “يمام-سىماق” ءۇش ايەلى بارىن ءسوز ەتىپ، سوڭعىسىن ءوزىنىڭ شاكىرتىنە “سىيعا تارتقانىن” جايباراقات جاريا ەتتى. بۇل مالىمدەمەنى ادامي مورالعا جات قىلىق قانا ەمەس، سونىمەن بىرگە ازاماتتىق نەكە جونىندەگى زاڭنامانى كوپە-كورنەۋ بۇزۋ، قازىرگى قازاقستانداعى ءداستۇرلى ءدىندى مانسۇق ەتۋ جانە ونىڭ قۇندىلىقتارىنا قاسا-قانا نۇقسان كەلتىرۋ دەپ ءتۇسىنۋ كەرەك. جالپى ادامدى سىيعا تارتۋ – بۇل ادام ساتۋ، ادام ساۋداسى ساناتىنداعى قىلمىس سانالۋى ءتيىس! زاڭدى بەلشەسىنەن باسىپ، ويىنا كەلگەن شاريعاتىن شاتىپ وتىراتىن مۇندايلارعا توسقاۋىل قويىلۋى كەرەك! ادام تۇگىلى، حايۋانعا جاناشىرلىق تانىتۋدى دارىپتەيتىن ءدىن وكىلى ءوز ايەلىن حايۋاننان بەتەر ەتىپ، اشىق سىيعا بەرۋى –قوعامدىق جازعىرۋعا پارا-پار قىلمىس سانالۋى تيىس!»–دەدى باپي.
دەپۋتات ناۋرىز مەرەكەسىن حارام دەگەن جەلى قولدانۋشىسىنا قاتىستى دا پىكىر ءبىلدىردى.
«الەۋمەتتىك جەلىلەردى كەزىپ كەتكەن بۇل داقپىرت تابيعاتپەن تەل تۋاتىن مەرەكەنى جوققا شىعارۋ عانا ەمەس، سونىمەن بىرگە ءبىزدىڭ حالىقتىڭ عاسىرلاردان تامىر تارتاتىن سالت-داستۇرىنە، ۇلتتىق مادەنيەتى مەن بىرەگەيلىگىنە كۇمان كەلتىرۋدىڭ كەبى. تاقۋانىڭ ەل ىشىنە تاراپ بارا جاتقان ءتۇرپى تىلىمەن ايتقاندا: ينشاللاح، قوعامدى شۋلاتقان قوس قيقۋشى اكىمشىلىك جازاعا تارتىلىپ، ولارعا ايىپ سالىندى! بىراق، قۇرمەتتى باس پروكۋرور مىرزا، ەلدەگى ءدىني نەگىزدەگى قوعامدىق جارقىشاق اسقىنىپ كەتپەسىن دەسەك، اكىمشىلىك جازامەن عانا ۋشىعىپ بارا جاتقان جاعدايدى اۋىزدىقتاۋ ازدىق ەتەدى! اسىرەسە الەۋمەتتىك رەسۋرستار ارقىلى تەرىس ءدىني ناسيحات پەن ءدىني ارازدىقتى قوزدىرۋشى تۇلعالاردى قىلمىستىق جاۋاپكەرشىلىككە تارتۋعا مۇمكىندىك بەرەتىن زاڭ نورمالارىن دەپۋتاتتار كورپۋسىنىڭ تالقىلاۋىنا ۇسىنۋدى سۇرايمىن»،-دەدى ول.
سونداي-اق باپي قازاقستان مۇسىلماندارى قاۋىمداستىعىنا قاتىستى ۇسىنىسىن دا ايتىپ ءوتتى.
«قوس دۇمشەنىڭ دۇربەلەڭىنە قاتىستى قاۋىمداستىقتىڭ ءدىن قايراتكەرلەرى مەن ءدىني شەنەۋنىكتەرى تاراپىنان قارسى پىكىر ايتىلعانىن ەستىمەدىم. ءتىپتى، مەنىڭ ويىمشا، رەسمي قاۋىمداستىق سىرتتان سىڭگەن تەرىس ءدىندارلاردان قايمىعىپ، “سەن تيمەسەڭ، مەن تيمەن، بادىراق كوزدىڭ كەبىن كيگەن ءتارىزدى. قاراپايىم تىلدە “قمدب” دەپ قىسقارتىلىپ اتالاتىن قاۋىم ءوز جۇمىسىن قايتا قاراۋى كەرەك دەپ ەسەپتەيمىن. ولار تسيفرلىق كەڭىستىككە شىعىپ، ەل ءىشى مەن ونلاين ورتاداعى ءدىني كيكىلجىڭگە دەر كەزىندە رەاكتسيا جاساپ، قوعامدى زۇلىم ۋاعىزدار قورشاۋىندا قالدىرماۋى ءتيىس!»- دەپ تۇيىندەدى ول.
