Mäjılıs deputaty Ermūrat Bapi äleumettık jelılerde taraǧan terıs dıni aqparattar pen qaqtyǧystarǧa qatysty pıkır bıldırdı, dep habarlaidy «Adyrna» tılşısı.
Ol qarabaiyr dındarlardyŋ ūlttyq ūstanymdy ırıtıp jatqanyn jetkızdı.
«İnternet podkastardyŋ bırınde resmi dıni qūrylymǧa qatysy joq äldebır “imam-symaq” üş äielı baryn söz etıp, soŋǧysyn özınıŋ şäkırtıne “syiǧa tartqanyn” jaibaraqat jariia ettı. Būl mälımdemenı adami moralǧa jat qylyq qana emes, sonymen bırge azamattyq neke jönındegı zaŋnamany köpe-körneu būzu, qazırgı Qazaqstandaǧy dästürlı dındı mansūq etu jäne onyŋ qūndylyqtaryna qasa-qana nūqsan keltıru dep tüsınu kerek. Jalpy adamdy syiǧa tartu – būl adam satu, adam saudasy sanatyndaǧy qylmys sanaluy tiıs! Zaŋdy belşesınen basyp, oiyna kelgen şariǧatyn şatyp otyratyn mūndailarǧa tosqauyl qoiyluy kerek! Adam tügılı, haiuanǧa janaşyrlyq tanytudy därıpteitın dın ökılı öz äielın haiuannan beter etıp, aşyq syiǧa beruı –qoǧamdyq jazǧyruǧa para-par qylmys sanaluy tiıs!»–dedı Bapi.
Deputat Nauryz merekesın haram degen jelı qoldanuşysyna qatysty da pıkır bıldırdı.
«Äleumettık jelılerdı kezıp ketken būl daqpyrt tabiǧatpen tel tuatyn merekenı joqqa şyǧaru ǧana emes, sonymen bırge bızdıŋ halyqtyŋ ǧasyrlardan tamyr tartatyn salt-dästürıne, ūlttyq mädenietı men bıregeilıgıne kümän keltırudıŋ kebı. Taquanyŋ el ışıne tarap bara jatqan türpı tılımen aitqanda: İnşallah, qoǧamdy şulatqan qos qiquşy äkımşılık jazaǧa tartylyp, olarǧa aiyp salyndy! Bıraq, qūrmettı Bas prokuror myrza, eldegı dıni negızdegı qoǧamdyq jarqyşaq asqynyp ketpesın desek, äkımşılık jazamen ǧana uşyǧyp bara jatqan jaǧdaidy auyzdyqtau azdyq etedı! Äsırese äleumettık resurstar arqyly terıs dıni nasihat pen dıni arazdyqty qozdyruşy tūlǧalardy qylmystyq jauapkerşılıkke tartuǧa mümkındık beretın zaŋ normalaryn deputattar korpusynyŋ talqylauyna ūsynudy sūraimyn»,-dedı ol.
Sondai-aq Bapi Qazaqstan mūsylmandary qauymdastyǧyna qatysty ūsynysyn da aityp öttı.
«Qos dümşenıŋ dürbeleŋıne qatysty qauymdastyqtyŋ dın qairatkerlerı men dıni şeneunıkterı tarapynan qarsy pıkır aitylǧanyn estımedım. Tıptı, menıŋ oiymşa, resmi qauymdastyq syrttan sıŋgen terıs dındarlardan qaimyǧyp, “sen timeseŋ, men timen, badyraq közdıŋ kebın kigen tärızdı. Qarapaiym tılde “QMDB” dep qysqartylyp atalatyn qauym öz jūmysyn qaita qarauy kerek dep esepteimın. Olar sifrlyq keŋıstıkke şyǧyp, el ışı men onlain ortadaǧy dıni kikıljıŋge der kezınde reaksiia jasap, qoǧamdy zūlym uaǧyzdar qorşauynda qaldyrmauy tiıs!»- dep tüiındedı ol.
