"ۇلتتىق قۇندىلىقتارعا قارسى كەلۋ دۇرىس ەمەس." ءدىني باسقارما "حارام" دەپ شاعىناتىندارعا جاۋاپ قاتتى

2259
Adyrna.kz Telegram
قازاقستان مۇسىلماندارى ءدىني باسقارماسى سالت-داستۇردەن "جەرىنىپ", ۇلتتىق قۇندىلىقتاردى "حارام" اتايتىندارعا رەسمي تۇردە جاۋاپ بەردى، دەپ حابارلايدى "ادىرنا" ۇلتتىق پورتالى.  
رەسمي جاۋاپ: "الەۋمەتتىك جەلىدە كەيبىر ءىنى-قارىنداستارىمىزدىڭ "دومبىرا شەرتۋ، بەتاشار جاساۋ، كەلىننىڭ سالەم سالۋى - حارام" دەگەن ماعىنادا ايتقان پىكىرى قوعامدا تۇسىنبەۋشىلىك تۋدىرۋدا"  دەپ باستالادى. كەيىننەن باسقارما وكىلدەرى ناقتى دەرەكەر كەلتىرۋگە ويىسادى:
"يسلام الەمىندەگى تانىمال عۇلامالاردىڭ ءبىرى دە بىرەگەيى يمام ءال-عازالي مەن ءابۋ حانيفا ءمازھابىنىڭ كورنەكتى عالىمى ابدۋل-عاني ءان-ءنابۋلۋسيدىڭ كوزقاراسى بويىنشا ءدىندى ناسيحاتتاۋ، حالىقتى وتانسۇيگىشتىككە، يماندىلىققا، بىرلىك پەن ادامگەرشىلىككە شاقىرۋ ماعىناسىندا ايتىلعان انگە رۇقسات. ال ادامعا جامان وي تاستايتىن، اراق پەن ادەپسىز ىسكە ۇندەيتىن ءان ايتۋعا شاريعاتىمىز تىيىم سالعان. عۇلاما ابدۋل-عاني ءان-ءنابۋلۋسي ءوزىنىڭ كىتابىندا: "پايعامبارىمىزدىڭ كەيبىر حاديستەرىندەگى اۋەنگە بايلانىستى تىيىمدار وسىنداي تەرىس باعىتقا جەتەلەيتىن اۋەندەرگە بايلانىستى بولسا كەرەك" ء(ال-يمامۋل-اكبار ماحمۋد ءشالتۋت، ءال-ءفاتااۋا. 355-بەت) دەپ جازادى". قازاقستان مۇسىلماندارى ءدىني باسقارماسى.

كەيىننەن باسقارما ماماندارى "دومبىرا شەرتۋ، بەتاشار جاساۋ، سالەم سالۋ - حارام" دەگەن ماعىنادا بىرجاقتى، نەگىزسىز پىكىر ايتىپ، حالىق اراسىندا تۇسىنبەۋشىلىك تۋدىرعانداردى تەزگە سالاتىن ءسوز ايتادى:

"سان عاسىردان بەرى يسلام ءدىنىن ۇستانىپ كەلە جاتقان قازاق حالقى ۇلتتىق اسپابىمىز - دومبىرا ارقىلى ءان، تەرمە-تولعاۋ شىرقاپ، تىڭداۋشىنى يماندىلىققا، ىزگىلىككە، ادامگەرشىلىككە، وتاندى قورعاۋعا، اتا-انامىزدى قادىرلەۋگە شاقىرعان. قازاقستان مۇسىلماندارى ءدىني باسقارماسى الەۋمەتتىك جەلى قولدانۋشىلارىن "دومبىرا شەرتۋ، بەتاشار جاساۋ، سالەم سالۋ - حارام" دەگەن ماعىنادا بىرجاقتى، نەگىزسىز پىكىر ايتىپ، حالىق اراسىندا تۇسىنبەۋشىلىك تۋدىرماۋعا ۇندەيدى. ۇلتتىق قۇندىلىقتارعا قارسى كەلۋ دۇرىس ەمەس ەكەنىن مالىمدەيمىز", - دەلىنگەن قمدب مالىمدەمەسىندە.

ەسكە سالا كەتەيىك، سوڭعى كەزدەرى ۇلتتىق قۇندىلىقتارعا "جاۋىعىپ", حالىقتىق يگىلىكتەردى "ارام" ەسەبىندە تىلدەۋ كەڭ ەتەك الدى. ايتا كەتسەك، الەۋمەتتىك جەلىدە "دومبىرا - حارام" دەگەن ورامالداعى قىزدىڭ ۆيدەوسى تاراعان بولاتىن. وندا ول:

"اقىرەتتە ۇلتىمىزبەن، ۇلتشىلدىعىمىزبەن وتپەيمىز. يمانىمىزبەن، نەكەمىزبەن وتەمىز. مەن دومبىراعا 5 جىل قاتىستىم. مەنىڭ دومبىرا تارتقانىم YouTube-تە ءجۇر. مەكتەپ كەزىندە ءدىن تۋرالى بىلگەن جوقپىن. كۇنى كەشەگە دەيىن دومبىرا تارتتىم. بىراق، دومبىرا – حارام. جۇرەككە ءتيدى، كىر ەكەنىڭ بىلىنەدى", – دەپ ايتادى.

ال قازاقستان مۇسىلماندارى ءدىني باسقارماسى وكىلدەرى "ناسيحاتشىلاردى" دالەلسىز، دايەكسىز ەلدى دۇرلىكتىرىپ، تۇسىنىسپەۋشىلىك تۋدىرماۋعا شاقىرادى.

"ادىرنا" ۇلتتىق پورتالى

پىكىرلەر