"Ulttyq qundylyqtarǵa qarsy kelý durys emes." Dinı basqarma "haram" dep shaǵynatyndarǵa jaýap qatty

2841
Adyrna.kz Telegram
Qazaqstan musylmandary dinı basqarmasy salt-dástúrden "jerinip", ulttyq qundylyqtardy "haram" ataıtyndarǵa resmı túrde jaýap berdi, dep habarlaıdy "Adyrna" ulttyq portaly.  
Resmı jaýap: "Áleýmettik jelide keıbir ini-qaryndastarymyzdyń "dombyra shertý, betashar jasaý, kelinniń sálem salýy - haram" degen maǵynada aıtqan pikiri qoǵamda túsinbeýshilik týdyrýda"  dep bastalady. Keıinnen basqarma ókilderi naqty dereker keltirýge oıysady:
"Islam álemindegi tanymal ǵulamalardyń biri de biregeıi Imam ál-Ǵazalı men Ábý Hanıfa mázhabynyń kórnekti ǵalymy Abdýl-Ǵanı án-Nábýlýsıdiń kózqarasy boıynsha dindi nasıhattaý, halyqty otansúıgishtikke, ımandylyqqa, birlik pen adamgershilikke shaqyrý maǵynasynda aıtylǵan ánge ruqsat. Al adamǵa jaman oı tastaıtyn, araq pen ádepsiz iske úndeıtin án aıtýǵa sharıǵatymyz tyıym salǵan. Ǵulama Abdýl-Ǵanı án-Nábýlýsı óziniń kitabynda: "Paıǵambarymyzdyń keıbir hadısterindegi áýenge baılanysty tyıymdar osyndaı teris baǵytqa jeteleıtin áýenderge baılanysty bolsa kerek" (ál-Imamýl-ákbar Mahmýd Sháltýt, Ál-Fátaaýa. 355-bet) dep jazady". Qazaqstan musylmandary dinı basqarmasy.

Keıinnen basqarma mamandary "dombyra shertý, betashar jasaý, sálem salý - haram" degen maǵynada birjaqty, negizsiz pikir aıtyp, halyq arasynda túsinbeýshilik týdyrǵandardy tezge salatyn sóz aıtady:

"San ǵasyrdan beri Islam dinin ustanyp kele jatqan qazaq halqy ulttyq aspabymyz - dombyra arqyly án, terme-tolǵaý shyrqap, tyńdaýshyny ımandylyqqa, izgilikke, adamgershilikke, Otandy qorǵaýǵa, ata-anamyzdy qadirleýge shaqyrǵan. Qazaqstan musylmandary dinı basqarmasy áleýmettik jeli qoldanýshylaryn "dombyra shertý, betashar jasaý, sálem salý - haram" degen maǵynada birjaqty, negizsiz pikir aıtyp, halyq arasynda túsinbeýshilik týdyrmaýǵa úndeıdi. Ulttyq qundylyqtarǵa qarsy kelý durys emes ekenin málimdeımiz", - delingen QMDB málimdemesinde.

Eske sala keteıik, sońǵy kezderi ulttyq qundylyqtarǵa "jaýyǵyp", halyqtyq ıgilikterdi "aram" esebinde tildeý keń etek aldy. Aıta ketsek, áleýmettik jelide "dombyra - haram" degen oramaldaǵy qyzdyń vıdeosy taraǵan bolatyn. Onda ol:

"Aqyrette ultymyzben, ultshyldyǵymyzben ótpeımiz. Imanymyzben, nekemizben ótemiz. Men dombyraǵa 5 jyl qatystym. Meniń dombyra tartqanym YouTube-te júr. Mektep kezinde din týraly bilgen joqpyn. Kúni keshege deıin dombyra tarttym. Biraq, dombyra – haram. Júrekke tıdi, kir ekeniń bilinedi", – dep aıtady.

Al Qazaqstan musylmandary dinı basqarmasy ókilderi "nasıhatshylardy" dálelsiz, dáıeksiz eldi dúrliktirip, túsinispeýshilik týdyrmaýǵa shaqyrady.

"Adyrna" ulttyq portaly

Pikirler