كابۋلدا العاش رەت اۋعانستان مەن ورتالىق ازيا ەلدەرىنىڭ كەڭەسى ءوتتى، دەپ حابارلايدى "ادىرنا" ۇلتتىق پورتالى.
جيىن 2026 جىلدىڭ 5 ساۋىرىندە كابۋل قالاسىندا بولعان. ءىس-شارانى اۋعانستان سىرتقى ىستەر مينيسترلىگى ۇيىمداستىردى.
كەزدەسۋدى اۋعانستاننىڭ سىرتقى ىستەر ءمينيسترى امير حان مۋتتاكي جۇرگىزدى. جيىنعا اۋعانستان مەن ورتالىق ازيا ەلدەرىنىڭ جوعارى لاۋازىمدى وكىلدەرى قاتىستى.
بۇل – 2021 جىلدان بەرى كابۋلدا وتكەن العاشقى وسىنداي فورماتتاعى كەزدەسۋ. بۇعان دەيىن ورتالىق ازيا ەلدەرى اۋعان تاراپىنىڭ وكىلدەرىمەن كەزدەسۋلەردى نەگىزىنەن باسقا قالالاردا وتكىزىپ كەلگەن.
كەلىسسوزدەر بارىسىندا ساياسي، ەكونوميكالىق جانە قاۋىپسىزدىك ماسەلەلەرى تالقىلاندى. سونداي-اق وڭىرلىك ىنتىماقتاستىقتى دامىتۋ، ساۋدا مەن ءترانزيتتى كەڭەيتۋ ماسەلەلەرى كۇن تارتىبىنە شىقتى. امير حان مۋتتاكي ءوز مالىمدەمەسىندە اۋعانستان مەن ورتالىق ازيا ەلدەرى ءۇشىن ورتاق قاۋىپ-قاتەرلەر قاتارىندا ەسىرتكى تاسىمالى جانە ترانسشەكارالىق قىلمىس بار ەكەنىن اتاپ ءوتتى.
اۋعان بيلىگى بۇل ديالوگتى ايماقپەن بايلانىستى نىعايتۋداعى ماڭىزدى قادام رەتىندە باعالاپ وتىر. ءمينيستردىڭ ايتۋىنشا، ەلدە مەملەكەتتىك باسقارۋ جۇيەسى نىعايىپ، تسيفرلاندىرۋ مەن بيۋروكراتيالىق پروتسەستەردى جەڭىلدەتۋ جۇمىستارى جۇرگىزىلۋدە.
ورتالىق ازيا ەلدەرى سوڭعى جىلدارى الەمدىك دەرجاۆلار جانە كورشى ەلدەرمەن س5+1فورماتىندا سامميت وتكىزۋدى ادەتكە اينالدىرىپ كەلە جاتىر.
