انكارا قالاسىنداعى تۇركسوي-دىڭ شتاب-پاتەرىندە «تۇركى الەمىندەگى رەپرەسسيالار» تاقىرىبىندا جيىن ءوتىپ، وسى اتتاس كىتاپتىڭ تۇساۋكەسەرى ۇيىمداستىرىلدى. ءىس-شارا 1926 جىلى باكۋدە وتكەن ءى تۇركولوگيالىق سەزدىڭ 100 جىلدىعىنا ارنالدى.
جيىندى تۇركسوي، انكاراداعى احمەد دجاۆاد ينستيتۋتى جانە انكارا حادجي بايرام ۆەلي ۋنيۆەرسيتەتى بىرلەسىپ وتكىزدى. باسقوسۋعا تۇركى مەملەكەتتەرىنەن ديپلوماتتار، عالىمدار، ساراپشىلار، ۇكىمەتتىك ەمەس ۇيىم وكىلدەرى، قوعام قايراتكەرلەرى جانە باق وكىلدەرى قاتىستى.
جيىندا ءسوز سويلەگەن تۇركسوي باس حاتشىسى سۇلتان راەۆ 1926 جىلعى باكۋ سەزىنىڭ تۇركى حالىقتارىنىڭ جاقىنداسۋى مەن ىنتىماقتاستىعى جولىنداعى تاريحي ماڭىزىن اتاپ ءوتتى. ونىڭ ايتۋىنشا، سەزگە قاتىسقان كوپتەگەن زيالىلار كەيىننەن قۋعىن-سۇرگىنگە ۇشىراپ، اتىلعان نەمەسە جەر اۋدارىلعان. سوندىقتان بۇل كەزەڭدى زەرتتەۋ جانە تاريحي ادىلدىكتى قالپىنا كەلتىرۋ ماڭىزدى.
تانىستىرىلعان «تۇركى الەمىندەگى رەپرەسسيالار» كىتابى 2025 جىلدىڭ اقپان ايىندا انكارادا وتكەن ءى تۇركولوگيالىق سەزگە ارنالعان عىلىمي سەمينار ماتەريالدارى نەگىزىندە ازىرلەنگەن. جيناققا تۇركى الەمىندەگى ساياسي قۋعىن-سۇرگىن تاقىرىبىن قامتيتىن عىلىمي ماقالالار مەن زەرتتەۋلەر ەنگەن.
ۇيىمداستىرۋشىلاردىڭ ايتۋىنشا، باسىلىم تۇركى حالىقتارىنىڭ ورتاق تاريحي جادىن جاڭعىرتۋعا جانە عىلىمي ىنتىماقتاستىقتى نىعايتۋعا باعىتتالعان.
