«سامۇرىق-ەنەرگو» قاتىساتىن جوبالار اياسىندا كوكشەتاۋ، سەمەي جانە وسكەمەن قالالارىندا جىلۋ ەلەكتر ورتالىقتارىن (جەو) سالۋدى قازاقستاندىق-سينگاپۋرلىق كونسورتسيۋم جۇزەگە اسىرادى، دەپ حابارلايدى "ادىرنا" ۇلتتىق پورتالى.
بۇل تۋرالى ۇكىمەتتەگى بريفينگتە سۇڭعات ەسىمحانوۆ مالىمدەدى.
سۇڭعات ەسىمحانوۆتىڭ سوزىنشە، جوبالارعا رەسەيلىك مەردىگەرلەر قاتىسپايدى. كەلىسىمشارتتار تولىقتاي قازاقستاندىق تاراپپەن جاسالعان.
ۆيتسە-ءمينيستردىڭ ايتۋىنشا، سەمەي مەن وسكەمەندەگى جوبالار بويىنشا 2026 جىلدىڭ باسىندا كەلىسىمشارتتار جاسالعان. جاقىن ايلاردا قۇرىلىس جۇمىستارىنىڭ بەلسەندى كەزەڭى باستالادى دەپ تە جوسپارلعان. مامىر ايىندا نەگىزگى جابدىقتارعا تاپسىرىس بەرىلىپ، ينجەنەرلىك زەرتتەۋلەر مەن قۇرىلىس الاڭدارىن دايىنداۋ قاتار جۇرگىزىلەدى.
نەگىزگى جابدىقتاردى جەتكىزۋ 2027 جىلدىڭ ءۇشىنشى توقسانىنا جوسپارلانعان، ال ستانتسيالاردى پايدالانۋعا بەرۋ 2029 جىلدىڭ ءتورتىنشى توقسانىنا كوزدەلگەن.
ال كوكشەتاۋداعى جەو قۇرىلىسى دايىندىق جانە ءىشىنارا قۇرىلىس كەزەڭىندە ەكەنى ايتىلدى. قازىرگى ۋاقىتتا ينجەنەرلىك جەلىلەر تارتىلىپ، كىرمە جولدار سالىنعان. جوبالىق-سمەتالىق قۇجاتتاما ازىرلەنىپ جاتىر. مينيسترلىك مالىمەتىنشە، 2026 جىلى اكىمشىلىك عيماراتتىڭ قۇرىلىسى باستالماق.
سونداي-اق ستانتسيانىڭ جىلۋ قۋاتىن 520-دان 820 گيگاكالورياعا دەيىن ارتتىرۋ تۋرالى شەشىم قابىلدانعان. كوكشەتاۋداعى جەو-نى ىسكە قوسۋ 2029 جىلدىڭ ءبىرىنشى توقسانىنا جوسپارلانعان.
ءۇش ستانتسيادا دا «تازا كومىر» تەحنولوگيالارى مەن جاساندى ينتەللەكت ەلەمەنتتەرى ەنگىزىلەدى. جوبالاردا زاماناۋي، سونىڭ ىشىندە قىتايلىق تەحنولوگيالار قولدانىلماق. كوكشەتاۋ جەو قۇرىلىسى شامامەن 350 ملرد تەڭگە، سەمەي جانە وسكەمەن جەو ارقايسىسى شامامەن 400 ملرد تەڭگەنى قۇراعان.
بۇل جوبالار تارتىلعان ينۆەستيتسيالار ارقىلى جۇزەگە اسىرىلادى. كومپانيالار نىسانداردى ءوز قاراجاتىنا سالىپ، كەيىن پايدالانۋعا بەرىلگەن سوڭ عانا شىعىندارىن وتەي باستايدى.
