الەۋمەتتىك جەلىلەردە امەريكالىق بلوگەر كوننوردىڭ قازاقستانعا ساپارى تۋرالى ۆيدەوسى قىزۋ تالقىلانۋدا. ول ەلگە تۋريزم مينيسترلىگىنىڭ شاقىرتۋىمەن كەلگەنىن ايتىپ، الايدا قازاقستانعا كەلگەن ساتتە ەشكىم ونى قارسى الماعانىن جانە بايلانىس بولماعانىن مالىمدەگەن. بۇل جاعدايعا بايلانىستى قازاقستان رەسپۋبليكاسىنىڭ تۋريزم جانە سپورت مينيسترلىگى تۇسىنىكتەمە بەردى، دەپ حابارلايدى "ادىرنا".
بلوگەردىڭ ايتۋىنشا، ول ساپارىن بىرنەشە اي بويى جوسپارلاپ، قىرعىزستاننان كەيىن قازاقستاننان دا جىلى قابىلداۋ كۇتەتىنىن ايتقان. الايدا شەكارادا رەسمي قارسى الۋ بولماعان، ءتىپتى ونىڭ سوزىنە قاراعاندا، ەلگە كىرۋ سەبەبى بويىنشا قوسىمشا تەكسەرىس تە جۇرگىزىلگەن.
ء"سىزدى ەلگە رەسمي تۇردە شاقىردى دەپ ەلەستەتىڭىزشى. ءسىز بىرنەشە اپتا مەن اي بويى جوسپاردى تالقىلاپ، ەگجەي-تەگجەيىن كەلىسەسىز، ال كەلگەن كۇنى تۋريزم مينيسترلىگى ءسىز تۋرالى جاي عانا ۇمىتىپ كەتەدى", - دەدى ول.
مينيسترلىك كوننوردىڭ رەسمي شاقىرتۋ العانى تۋرالى اقپاراتتى جوققا شىعاردى. "مينيسترلىك توپتىق اقپاراتتىق تۋرلار اياسىندا شەتەلدىك بلوگەرلەردى، تۋريستىك قاۋىمداستىقتار مەن كومپانيالاردى شاقىرۋ بويىنشا جۇيەلى جۇمىس جۇرگىزەدى، ۆەدومستۆو جۇمىسىنىڭ شەڭبەرىندە جەكە تۇلعالاردى شاقىرۋ قاراستىرىلماعان. جەكەلەگەن رەسمي وتىنىشتەر بولعان جاعدايدا مينيسترلىك جان-جاقتى قولداۋ كورسەتەدى، اتالعان بلوگەردەن مينيسترلىككە ءوتىنىش تۇسكەن جوق", - دەپ حابارلادى ۆەدومستۆو.
سونىمەن قاتار، بلوگەرمەن حات الماسۋ "Kazakh Tourism" ۇلتتىق كومپانياسى اتىنان جۇرگىزىلگەنى ناقتىلاندى. كومپانيا مالىمەتىنشە، كەلىسسوزدەر ناقتى ۋاعدالاستىقپەن اياقتالماعان.
"Kazakh Tourism ۇلتتىق كومپانياسى ءوز تاراپىنان اقپاراتتىق قولداۋ كورسەتۋگە جانە ەلدىڭ تۋريستىك الەۋەتىمەن تانىسۋ ءۇشىن قاجەتتى مالىمەتتەردى ۇسىنۋعا دايىن", - دەپ تۇيىندەدى مينيسترلىكتەگىلەر.
