2025 جىلدىڭ قورىتىندىسى بويىنشا قازاقستان ستراتەگيالىق ماڭىزدى مەجەدەن ءوتتى: وتاندىق IT-قىزمەتتەر ەكسپورتى 1,142 ملرد اقش دوللارىن قۇرادى. ۇلتتىق بانك تىركەگەن بۇل كورسەتكىشتەر ەلدىڭ تەحنولوگيالاردىڭ تازا ەكسپورتەرىنە اينالعانىن ايعاقتايدى. قازىرگى ەكسپورتتىق ءتۇسىم كولەمى شەتەلدىك تسيفرلىق شەشىمدەر يمپورتىنا جۇمسالعان شىعىنداردان 2,6 ەسەدەن اسادى.
ايتا كەتۋ كەرەك، ەكسپورتتىق ءتۇسىمنىڭ 1,1 ميلليارد دوللارلىق دەڭگەيگە جەتۋى - ەلدىڭ تسيفرلىق ەكوجۇيەسىنىڭ كەمەلدەنگەنىنىڭ كورسەتكىشى. ۇلتتىق بانك دەرەكتەرى قازاقستاندىق IT-شەشىمدەر بۇگىندە الەمنىڭ 110-نان استام ەلىندە سۇرانىسقا يە ەكەنىن راستايدى. قازىرگى باستى باسىمدىق - وتاندىق يننوۆاتسيالاردى جاھاندىق قوسىلعان قۇن تىزبەگىنە ينتەگراتسيالاۋ ءۇشىن كرەمني القابىنان وڭتۇستىك-شىعىس ازياعا دەيىنگى حالىقارالىق حابتار جەلىسى ارقىلى بۇل ىقپالدى ودان ءارى كەڭەيتۋ.
جاساندى ينتەللەكت جانە تسيفرلىق دامۋ مينيسترلىگى كەشەندى شارالاردى جۇزەگە اسىرۋدا جانە ونىڭ نەگىزگى درايۆەرى Astana Hub بولىپ قالا بەرەدى: ونىڭ رەزيدەنتتەرىنىڭ ەكسپورتى 633 ملن اقش دوللارىنا جەتتى. بۇگىندە 537 كومپانيا شەتەلگە ساۋدا جاساپ وتىر، ال جەتكىزۋ گەوگرافياسى گەرمانيا، يسپانيا، نيدەرلاندى جانە ءباا-ءنى قامتيدى. ەكوجۇيەدە 32,5 مىڭنان استام جۇمىس ورنى قۇرىلدى، ال e-residency جوباسى 6 مىڭنان استام شەتەلدىك ماماننىڭ قازاقستاننىڭ تسيفرلىق ينفراقۇرىلىمىنا قول جەتكىزۋىن قامتاماسىز ەتتى.
«IT-قىزمەتتەر ەكسپورتىن دامىتۋ - ەلىمىزدىڭ تولىققاندى تسيفرلىق ەكونوميكاسىن قالىپتاستىرۋ بويىنشا قر جيتسدم تسيفرلىق اكتيۆتەر جانە سەرپىندى تەحنولوگيالار كوميتەتىنىڭ جۇيەلى جۇمىسىنىڭ نەگىزگى باعىتتارىنىڭ ءبىرى. بۇگىندە ءبىز قازاقستاندىق IT-كومپانيالاردىڭ حالىقارالىق نارىقتارعا شىعۋىنا، ءوز شەشىمدەرىن اۋقىمداندىرۋىنا جانە جاھاندىق تسيفرلىق ەكونوميكانىڭ ءبىر بولىگىنە اينالۋىنا دايەكتى تۇردە جاعداي جاساپ كەلەمىز. 1 ملرد دوللارلىق مەجە - قۇرىلعان قولداۋ شارالارىنىڭ، ەكوجۇيەنى دامىتۋدىڭ جانە حالىقارالىق دەڭگەيدە ىلگەرىلەتۋدىڭ ناتيجە بەرىپ جاتقانىنىڭ ماڭىزدى كورسەتكىشى. ءبىزدىڭ مىندەتىمىز - وسى ءوسىمدى نىعايتۋ جانە تسيفرلىق قىزمەتتەر ەكسپورتىن ودان ءارى ارتتىرۋ ءۇشىن ورنىقتى نەگىز قالاۋ»، - دەپ اتاپ ءوتتى قر جيتسدم تسيفرلىق اكتيۆتەر جانە سەرپىندى تەحنولوگيالار كوميتەتىنىڭ توراعاسى عيززات بايتۇرسىنوۆ.
ەلدىڭ جاھاندىق دەڭگەيدەگى قاتىسۋى پالو-التو، شانحاي جانە دۋبايداعى حالىقارالىق يننوۆاتسيالىق حابتار ارقىلى دا نىعايۋدا. دامۋدىڭ جاڭا ۆەكتورى وڭتۇستىك-شىعىس ازيا ايماعى بولدى: تاشكەنتتە وتكەن CEVF 2026 فورۋمىندا Astana Hub, IT Park Uzbekistan جانە Big Sky Capital ۆەنچۋرلىق قورى اراسىندا ۇشجاقتى مەموراندۋمعا قول قويىلدى. سەرىكتەستىك مالايزيادا تەحنولوگيالىق حاب اشۋدى كوزدەيدى، ول قازاقستاندىق ستارتاپتار ءۇشىن جاڭا پەرسپەكتيۆالى نارىقتارعا شىعۋ نۇكتەسىنە اينالادى. Silkway Accelerator جانە Hero Training سياقتى اكسەلەراتسيا باعدارلامالارى جەرگىلىكتى يدەيالاردى باسەكەگە قابىلەتتى ەكسپورتتىق ونىمگە اينالدىرۋدى جالعاستىرۋدا.
