الماتىداعى قر ۇلتتىق كىتاپحاناسىندا «شالقار» راديوسىنىڭ 60 جىلدىعىنا ارنالعان سالتاناتتى ءىس-شارا ءوتىپ، جاڭا كىتاپ تانىستىرىلدى.
شاراعا قر پرەزيدەنتىنىڭ كەڭەسشىسى مالىك وتارباەۆ، قر مادەنيەت جانە اقپارات ءبىرىنشى ۆيتسە-ءمينيسترى قانات ىسقاقوۆ، قر ەڭبەك سىڭىرگەن قايراتكەرى، ف.ع.د، پروفەسسور نامازالى وماشەۆ، قر جۋرناليستەر وداعىنىڭ توراعاسى سەيىتقازى ماتاەۆ، «قازاقستان» رترك» اق باسقارما توراعاسى ەرنۇر بۋراحان، «شالقار» راديوسىنىڭ ارداگەرلەرى مەن قىزمەتكەرلەرى، زيالى قاۋىم وكىلدەرى قاتىستى.
سالتاناتتى جيىن مەملەكەت باسشىسىنىڭ قۇتتىقتاۋ حاتىمەن اشىلدى. سەنات جانە ءماجىلىس توراعالارى، مەملەكەتتىك كەڭەسشى، پرەمەر-مينيستر، قر پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى دە قۇتتىقتاۋلارىن جولدادى. راديونىڭ دامۋىنا ۇلەس قوسقان ارداگەرلەر مەن قىزمەتكەرلەرگە ماراپات تابىستالدى.
ارنانىڭ 60 جىلدىعىنا وراي جارىق كورگەن «ۇلتتىڭ ۇنبايراعى» اتتى كىتاپتىڭ تۇساۋكەسەر ءراسىمى ءوتتى. وعان راديو ارداگەرلەرى ساۋىق جاقانوۆا، رۋسلانا قۇدايبەرگەنوۆا، قۇسمان يگىسىنوۆ، نامازالى وماشەۆ، ءاشىرحان تەلعوزيەۆ، «اسىل كىتاپ» باسپاسىنىڭ ديرەكتورى جاسۇلان سەيداحمەتوۆ قاتىسىپ، ءسوز سويلەدى.
سونىمەن قاتار مەرەيتوي اياسىندا قازاقتىڭ تۇڭعىش راديوديكتورى، قازاق راديوسىنىڭ ارداگەرى، كسرو-نىڭ قۇرمەتتى ءراديسى، قازاق كسر-ءنىڭ ەڭبەك سىڭىرگەن مادەنيەت قىزمەتكەرى مينا سەيىتوۆا اتىنداعى ديكتورلار بايقاۋى جاريالاندى. بايقاۋ شارتتارى تۋرالى تولىق اقپارات «شالقار» راديوسىنىڭ سايتىندا (https://qazradio.fm/shalqarfm/kz/).
ناۋرىز ايىنىڭ باسىندا الماتى قالاسىنداعى «راديو ءۇيى» عيماراتىندا تولىق جوندەۋدەن وتكەن ستۋديا اشىلىپ، وعان قازاقتىڭ تۇڭعىش راديوديكتورى مينا سەيىتوۆانىڭ ەسىمى بەرىلدى.
مەرەيتويلىق شارا بارىسىندا «شالقار» راديوسىندا ءار جىلدارى ەڭبەك ەتكەن ارداگەرلەر جانە قوناقتار ەستەلىكتەرىمەن ءبولىسىپ، اسەرلى كەشتىڭ كۋاسى بولدى.
