بيىل قازاق وپەرا ونەرىنىڭ كورنەكتى وكىلى، ليريكالىق باريتون، كسرو جانە قازاقستاننىڭ حالىق ءارتىسى، پروفەسسور ەرمەك سەركەباەۆتىڭ تۋعانىنا 100 جىل تولدى، دەپ حابارلايدى "ادىرنا" ءتىلشىسى.
ەرمەك بەكمۇحامەدۇلى سەركەباەۆ 1926 جىلى دۇنيەگە كەلگەن. ول پەتر چايكوۆسكي اتىنداعى الماتى مۋزىكالىق ۋچيليششەسىن جانە قۇرمانعازى اتىنداعى قازاق ۇلتتىق كونسەرۆاتورياسىن تامامداعان.
ونەر يەسى قازاق جانە الەمدىك وپەرا ساحناسىندا كوپتەگەن جارقىن وبرازداردى سومدادى. ونىڭ ورىنداۋىنداعى احمەت جۇبانوۆ پەن لاتيف ءحاميديدىڭ «اباي» وپەراسىنداعى اباي، مۇقان تولەباەۆتىڭ ء«بىرجان – سارا» وپەراسىنداعى قوجاعۇل، پەتر چايكوۆسكيدىڭ «ەۆگەني ونەگين» مەن «پيكوۆايا داما» وپەرالارىنداعى ونەگين مەن ەلەتسكي، دجواككينو ءروسسينيدىڭ «سەۆيل شاشتارازى» وپەراسىنداعى فيگارو كورەرمەننىڭ ىستىق ىقىلاسىنا بولەندى. سونداي-اق ەۆگەني برۋسيلوۆسكي مەن ەركەعالي راحماديەۆتىڭ وپەرالارىندا ەر تارعىن مەن الپامىس باتىر بەينەلەرىن شەبەر سومدادى.
سەركەباەۆ تەاتر ساحناسىمەن عانا شەكتەلمەي، كينو ونەرىندە دە ءوزىن تانىتتى. ول «تاقيالى پەرىشتە»، ء«بىزدىڭ سۇيىكتى دارىگەر» جانە وزگە دە فيلمدەردە ويناپ، قازاق كينوسىنىڭ دامۋىنا ۇلەس قوستى. ونەر جولىندا الەمنىڭ 50-دەن استام ەلىندە گاسترولدىك ساپارمەن بولىپ، قازاق مادەنيەتىن حالىقارالىق دەڭگەيدە تانىتتى.
1947 جىلدان ءومىرىنىڭ سوڭىنا دەيىن اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا سوليست قىزمەتىن اتقاردى. سونىمەن قاتار 1973 جىلدان باستاپ قۇرمانعازى اتىنداعى قازاق ۇلتتىق كونسەرۆاتورياسىندا ۆوكالدان ءدارىس بەرىپ، تالاي دارىندى شاكىرت تاربيەلەدى.
ەرمەك سەركەباەۆتىڭ ونەرى جوعارى باعالانىپ، ول «وتان»، لەنين، ەڭبەك قىزىل تۋ، قازان رەۆوليۋتسياسى وردەندەرىمەن جانە كوپتەگەن مەدالدارمەن ماراپاتتالدى. ول كسرو مەن قازاقستاننىڭ مەملەكەتتىك سىيلىقتارىنىڭ لاۋرەاتى، حالىقارالىق جانە بۇكىلوداقتىق ۆوكال بايقاۋلارىنىڭ جەڭىمپازى، «تارلان» سىيلىعىنىڭ يەگەرى بولدى.
