Biyl qazaq opera önerınıŋ körnektı ökılı, lirikalyq bariton, KSRO jäne Qazaqstannyŋ halyq ärtısı, professor Ermek Serkebaevtyŋ tuǧanyna 100 jyl toldy, dep habarlaidy "Adyrna" tılşısı.
Ermek Bekmūhamedūly Serkebaev 1926 jyly düniege kelgen. Ol Petr Chaikovskii atyndaǧy Almaty muzykalyq uchilişesın jäne Qūrmanǧazy atyndaǧy Qazaq ūlttyq konservatoriiasyn tämamdaǧan.
Öner iesı qazaq jäne älemdık opera sahnasynda köptegen jarqyn obrazdardy somdady. Onyŋ oryndauyndaǧy Ahmet Jūbanov pen Latif Hamididıŋ «Abai» operasyndaǧy Abai, Mūqan Tölebaevtyŋ «Bırjan – Sara» operasyndaǧy Qojaǧūl, Petr Chaikovskiidıŋ «Evgenii Onegin» men «Pikovaia dama» operalaryndaǧy Onegin men Eleskii, Djoakkino Rossinidıŋ «Sevil şaştarazy» operasyndaǧy Figaro körermennıŋ ystyq yqylasyna bölendı. Sondai-aq Evgenii Brusilovskii men Erkeǧali Rahmadievtıŋ operalarynda Er Tarǧyn men Alpamys batyr beinelerın şeber somdady.
Serkebaev teatr sahnasymen ǧana şektelmei, kino önerınde de özın tanytty. Ol «Taqiialy perışte», «Bızdıŋ süiıktı därıger» jäne özge de filmderde oinap, qazaq kinosynyŋ damuyna üles qosty. Öner jolynda älemnıŋ 50-den astam elınde gastroldık saparmen bolyp, qazaq mädenietın halyqaralyq deŋgeide tanytty.
1947 jyldan ömırınıŋ soŋyna deiın Abai atyndaǧy Qazaq memlekettık akademiialyq opera jäne balet teatrynda solist qyzmetın atqardy. Sonymen qatar 1973 jyldan bastap Qūrmanǧazy atyndaǧy Qazaq ūlttyq konservatoriiasynda vokaldan därıs berıp, talai daryndy şäkırt tärbieledı.
Ermek Serkebaevtyŋ önerı joǧary baǧalanyp, ol «Otan», Lenin, Eŋbek Qyzyl Tu, Qazan revoliusiiasy ordenderımen jäne köptegen medaldarmen marapattaldy. Ol KSRO men Qazaqstannyŋ Memlekettık syilyqtarynyŋ laureaty, halyqaralyq jäne bükılodaqtyq vokal baiqaularynyŋ jeŋımpazy, «Tarlan» syilyǧynyŋ iegerı boldy.
