12 ساۋىرگە اۋعان ءتۇنى استانانىڭ ەسىل اۋدانىندا ورنالاسقان تۇرعىن ءۇي كەشەندەرىنىڭ بىرىنەن ءورت شىعىپ، ءتىلسىز جاۋ ءۇش بالانىڭ ءومىرىن قيدى، دەپ حابارلايدى "ادىرنا".
قر تجم ءباسپاسوز قىزمەتىنەن حابارلاعانداي، ءورت ەسىل اۋدانى تۇركىستان كوشەسىندە ورنالاسقان 21 قاباتتى تۇرعىن ءۇيدىڭ 15-قاباتىنداعى پاتەردەن شىققان.
حابارلاماعا سايكەس، تجم كۇشتەرى مەن قۇرالدارى وقيعا ورنىنا جەدەل جەتكەن. العاشقى ءورت ءسوندىرۋ بولىمشەلەرى كەلگەن كەزدە پاتەر ورتەنىپ جاتقانى انىقتالدى.
ء“ورتتى ءسوندىرۋ بارىسىندا جانىپ جاتقان پاتەردەن كۇيىك العان ايەل قۇتقارىلىپ، جەدەل مەديتسينالىق جاردەم بريگاداسىنا تاپسىرىلدى. قازىرگى ۋاقىتتا ول №1 كوپسالالى قالالىق اۋرۋحانادا ەم قابىلداۋدا.
وكىنىشكە قاراي، وقيعا ورنىنان ءۇش كامەلەتكە تولماعان بالانىڭ دەنەسى تابىلدى”، – دەلىنگەن حابارلامادا.
تجم ماماندارى جوعارعى قاباتتاردان 20 ادامدى ەۆاكۋاتسيالادى، سونىمەن قاتار 40-قا جۋىق تۇرعىن عيماراتتان ءوز بەتىنشە قاۋىپسىز جەرگە شىقتى.
قازىرگى ۋاقىتتا ءورت تولىق ءسوندىرىلىپ، ونىڭ شىعۋ سەبەپتەرى انىقتالىپ جاتىر.
قالالىق اكىمدىكتىڭ مالىمەتىنشە، زارداپ شەككەن ايەلگە جانە قازا بولعانداردىڭ وتباسىنا قاجەتتى جان-جاقتى كومەك كورسەتىلەدى.
قايعىلى جاعداي بيلىك وكىلدەرىنىڭ تىكەلەي باقىلاۋىنا الىندى.
