13 ءساۋىر كۇنى پاۆلودار قالاسىندا جەر قازۋ جۇمىستارى كەزىندە توپىراق وپىرىلىپ ءتۇستى. وقيعا سالدارىنان بەس ادام ءۇيىندى استىندا قالىپ، ولاردىڭ ەكەۋى قازا تاپتى. بۇل تۋرالى پاۆلودار وبلىستىق توتەنشە جاعدايلار دەپارتامەنتى مالىمدەدى, دەپ حابارلايدى "ادىرنا".
مالىمەت بويىنشا، "112" پۋلتىنە وقيعا تۋرالى حابار 14:23-تە تۇسكەن. وپىرىلعان جەردىڭ تەرەڭدىگى شامامەن 6 مەتر بولعان. وقيعا ورنىنا قۇتقارۋشىلار مەن ءورت سوندىرۋشىلەر جەدەل تۇردە جىبەرىلدى.
"قۇتقارۋشىلار جەتكەنگە دەيىن كاسىپورىن جۇمىسشىلارى ءبىر ادامدى ءوز كۇشتەرىمەن شىعارىپ العان. كەيىن كەلگەن قۇتقارۋشىلار ءۇيىندى استىنان تاعى ەكى زارداپ شەگۋشىنى الىپ شىقتى. ولاردىڭ بارلىعىن تجم اپاتتار مەديتسيناسى ورتالىعىنىڭ ماماندارى تەكسەرىپ، العاشقى مەديتسينالىق كومەك كورسەتتى. ودان ءارى ولار جەدەل جاردەم بريگادالارىنا تاپسىرىلىپ، اۋرۋحاناعا جەتكىزىلدى", – دەلىنگەن حابارلامادا.
سونداي-اق، قۇتقارۋشىلار ءۇيىندى استىنان ەكى ادامنىڭ ءمايىتىن تاپقان. وقيعانىڭ ءمان-جايى انىقتالىپ جاتىر.
