مەملەكەت باسشىسى قاسىم-جومارت توقاەۆ تۇركيا ۆيتسە-پرەزيدەنتى دجەۆدەت يىلمازبەن كەزدەستى. بۇل تۋرالى بۇگىن، 15 ساۋىردە اقوردا جازدى، دەپ حابارلايدى «ادىرنا» ءتىلشىسى.
پرەزيدەنت ەلىمىزگە العاش رەت ساپارمەن كەلگەن دجەۆدەت يىلمازعا ءىلتيپات بىلدىرە وتىرىپ، باۋىرلاس تۇركيا قازاقستاننىڭ ستراتەگيالىق سەرىكتەسى ەكەنىنە نازار اۋداردى.
«باۋىرلاستىعىمىز ءوزارا سەنىم مەن قۇرمەتكە نەگىزدەلگەن. ديپلوماتيالىق قاتىناس ورناعان 35 جىلعا جۋىق ۋاقىت ىشىندە ءبىز كوپتەگەن بيىك بەلەستى باعىندىردىق. قارىم-قاتىناسىمىز جوعارى قارقىنمەن دامىپ كەلە جاتىر. ارامىزدا ەشقانداي تۇيتكىل جوق. 14 مامىردا پرەزيدەنت رەجەپ تايپ ەردوعان ەلىمىزگە مەملەكەتتىك ساپارمەن كەلەدى. ساپار اياسىندا ستراتەگيالىق ىنتىماقتاستىق كەڭەسىنىڭ كەزەكتى وتىرىسىن وتكىزەمىز. جاڭا كەلىسىمدەرگە قول قويامىز»،- دەدى مەملەكەت باسشىسى.
سونىمەن قاتار قاسىم-جومارت توقاەۆ بۇگىن استانادا قازاقستان پرەمەر-ءمينيسترى جانە تۇركيا ۆيتسە-پرەزيدەنتىنىڭ تەڭ توراعالىعىمەن وتكەن ۇكىمەتارالىق كوميسسيا قورىتىندىسى ەكى ەلدىڭ سان قىرلى ارىپتەستىگىن ودان ءارى جانداندىرا تۇسەتىنىنە سەنىم ءبىلدىردى.
اڭگىمەلەسۋ بارىسىندا ەكى ەلدىڭ ساۋدا-ەكونوميكالىق، مادەني-گۋمانيتارلىق ىنتىماقتاستىعىن نىعايتۋ پەرسپەكتيۆاسى تالقىلاندى. سونىڭ ىشىندە وڭدەۋ ونەركاسىبى، ينفراقۇرىلىم، ەنەرگەتيكا، لوگيستيكا، اگروونەركاسىپ كەشەنى، ءبىلىم جانە تۋريزم سالالارىندا بىرلەسكەن جوبالاردى جۇزەگە اسىرۋ مۇمكىندىكتەرى قاراستىرىلدى.
بۇدان بولەك، قاسىم-جومارت توقاەۆ پەن دجەۆدەت يىلماز حالىقارالىق كۇن تارتىبىندەگى وزەكتى ماسەلەلەر، تاياۋ شىعىستاعى كۇردەلى احۋال جونىندە پىكىر الماستى.
مەملەكەت باسشىسى تۇركيانىڭ ايماقتاعى تۇراقتىلىقتى قامتاماسىز ەتۋدەگى ءرولىن جوعارى باعالاپ، الداعى انتاليا ديپلوماتيالىق فورۋمىنا قاتىساتىنىن راستادى.
