Memleket basşysy Qasym-Jomart Toqaev Türkiia vise-prezidentı Djevdet Iylmazben kezdestı. Būl turaly bügın, 15 säuırde Aqorda jazdy, dep habarlaidy «Adyrna» tılşısı.
Prezident elımızge alǧaş ret saparmen kelgen Djevdet Iylmazǧa ıltipat bıldıre otyryp, bauyrlas Türkiia Qazaqstannyŋ strategiialyq serıktesı ekenıne nazar audardy.
«Bauyrlastyǧymyz özara senım men qūrmetke negızdelgen. Diplomatiialyq qatynas ornaǧan 35 jylǧa juyq uaqyt ışınde bız köptegen biık belestı baǧyndyrdyq. Qarym-qatynasymyz joǧary qarqynmen damyp kele jatyr. Aramyzda eşqandai tüitkıl joq. 14 mamyrda Prezident Rejep Taiip Erdoǧan elımızge memlekettık saparmen keledı. Sapar aiasynda Strategiialyq yntymaqtastyq keŋesınıŋ kezektı otyrysyn ötkızemız. Jaŋa kelısımderge qol qoiamyz»,- dedı memleket basşysy.
Sonymen qatar Qasym-Jomart Toqaev bügın Astanada Qazaqstan premer-ministrı jäne Türkiia vise-prezidentınıŋ teŋ töraǧalyǧymen ötken Ükımetaralyq komissiia qorytyndysy ekı eldıŋ san qyrly ärıptestıgın odan ärı jandandyra tüsetınıne senım bıldırdı.
Äŋgımelesu barysynda ekı eldıŋ sauda-ekonomikalyq, mädeni-gumanitarlyq yntymaqtastyǧyn nyǧaitu perspektivasy talqylandy. Sonyŋ ışınde öŋdeu önerkäsıbı, infraqūrylym, energetika, logistika, agroönerkäsıp keşenı, bılım jäne turizm salalarynda bırlesken jobalardy jüzege asyru mümkındıkterı qarastyryldy.
Būdan bölek, Qasym-Jomart Toqaev pen Djevdet Iylmaz halyqaralyq kün tärtıbındegı özektı mäseleler, Taiau Şyǧystaǧy kürdelı ahual jönınde pıkır almasty.
Memleket basşysy Türkiianyŋ aimaqtaǧy tūraqtylyqty qamtamasyz etudegı rölın joǧary baǧalap, aldaǧy Antaliia diplomatiialyq forumyna qatysatynyn rastady.
