الماتى وبلىسى قوناەۆ قالالىق سوتىندا «شاڭىراق» قوعامدىق بىرلەستىگىنىڭ جەتەكشىسى الماسبەك سادىرباي مەن تاعى التى ادامعا قاتىستى سوت پروتسەسى باستالدى. ولار الاياقتىق، قىلمىستىق جولمەن الىنعان اقشانى زاڭداستىرۋ جانە ۇيىمداسقان قىلمىستىق توپقا قاتىسۋ باپتارى بويىنشا ايىپتالىپ وتىر، دەپ حابارلايدى «ادىرنا» ءتىلشىسى قازتاگ-قا سىلتەمە جاساپ.
ءىستى سۋديا نۇرسۇلتان قويشىباەۆ قاراپ جاتىر. سوتتالۋشىلارعا قر قك-ءنىڭ 190-بابى (الاياقتىق), 262-بابى (ۇيىمداسقان توپتى، قىلمىستىق ۇيىمدى قۇرۋ جانە وعان باسشىلىق ەتۋ، سونداي-اق وعان قاتىسۋ), 218-بابى (قىلمىستىق جولمەن الىنعان اقشا مەن وزگە دە مۇلىكتى زاڭداستىرۋ) بويىنشا ايىپ تاعىلعان.
قاراشا ايىندا سادىرباي مەن تاعى التى ادامعا قاتىستى قىلمىستىق ءىستىڭ تەرگەۋى اياقتالعانى ايتىلعان ەدى. 2024 جىلعى 6 قاراشادا قارجىلىق مونيتورينگ اگەنتتىگىنىڭ ءباسپاسوز قىزمەتى سادىرباي 1,2 ملرد تەڭگە كولەمىندەگى سۋبسيديالاردى جىمقىرۋ جانە الاياقتىق جاسادى دەگەن كۇدىككە ىلىنگەنىن حابارلاعان.
بۇعان دەيىن قازتاگ قاماۋدا وتىرعان سادىرباي وزىنە قاتىستى قىلمىستىق ءىس بويىنشا جاساندى ينتەللەكت كومەگىمەن پرەزيدەنت قاسىم-جومارت توقاەۆقا ۇندەۋ جاساعانىن جازعان. بۇل ۆيدەوۇندەۋ الەۋمەتتىك جەلىلەردە جاريالانعان. سول كەزدە سادىرباي ء«بىر جىل بويى وڭ وزگەرىس بولادى دەپ ۇمىتتەنىپ، ءۇنسىز شىداپ، شاعىمدانباعانىن» ايتقان. ماتىنمەن قاتار بەرىلگەن ۇندەۋدە ونىڭ كىناسىن دالەلدەيتىن بىردە-ءبىر ايعاق جوق ەكەنى كورسەتىلگەن. سادىرباي وزىنە قاتىستى جاعدايدىڭ سەبەبى قوعامدىق قىزمەتىمەن بايلانىستى دەپ سانايدى. ۇندەۋدە سوڭعى ۋاقىتتا فەرمەرلەردىڭ ماسەلەلەرىن كوتەرىپ، ازىق-تۇلىك قاۋىپسىزدىگى تۋرالى ايتىپ، سىن پىكىرلەر بىلدىرگەنى اتاپ وتىلەدى.
ەسكە سالايىق، سادىرباي 2025 جىلدىڭ قاراشا ايىندا ۇستالعان.
