اقش-تىڭ يرانعا قارسى اسكەري وپەراتسياسى نەگىزگى امەريكالىق زىمىران قورىن ايتارلىقتاي ازايتتى. بۇل تۋرالى CNN تەلەارناسى ايتتى، دەپ حابارلايدى «ادىرنا» ءتىلشىسى.
شەتەلدىك باق مالىمەتىنشە، جەتى اپتاعا سوزىلعان سوعىس بارىسىندا اقش Precision Strike Missile جەدەل-تاكتيكالىق زىمىراندارىنىڭ كەمىندە 45 پايىزىن، بالليستيكالىق نىسانالاردى قاعىپ تۇسىرۋگە ارنالعان THAAD كەشەنى زىمىراندارىنىڭ كەم دەگەندە جارتىسىن جانە Patriot كەشەنىنىڭ زىمىران-توسقاۋىلدارىنىڭ شامامەن 50 پايىزىن جۇمساعان. بۇل باعالاۋلار ستراتەگيالىق جانە حالىقارالىق زەرتتەۋلەر ورتالىعىنىڭ (CSIS) جاڭا تالداۋىندا كەلتىرىلگەن.
ساراپشىلاردىڭ باعالاۋىنشا، بۇل الداعى بىرنەشە جىل ىشىندە جاڭا قاقتىعىس تۋىنداعان جاعدايدا قىسقا مەرزىمدە وق-ءدارى تاپشىلىعى قاۋپىن تۋدىرادى. بۇعان دەيىن پەنتاگون زىمىران ءوندىرىسىن ارتتىرۋعا كومەكتەسەتىن بىرقاتار كەلىسىمشارت جاساسقانى اتاپ وتىلەدى. الايدا ءوندىرىس كولەمى ۇلعايتىلعاننىڭ وزىندە بۇل جۇيەلەردىڭ قورىن تولىقتىرۋ مەرزىمى ءۇش جىلدان بەس جىلعا دەيىن سوزىلادى.
«وق-ءدارىنىڭ جوعارى كولەمدە جۇمسالۋى تىنىق مۇحيتىنىڭ باتىس بولىگىندە وسالدىق كەزەڭىن قالىپتاستىردى»، – دەدى باسىلىمعا اقش تەڭىز جاياۋ اسكەرىنىڭ وتستاۆكاداعى پولكوۆنيگى مارك كانسيان.
ال پەنتاگوننىڭ باس وكىلى شون پارنەلل تىلشىلەرگە اسكەريلەردىڭ پرەزيدەنت تاڭداعان ۋاقىت پەن جەردە مىندەتتەردى ورىنداۋعا قاجەتتى بارلىق مۇمكىندىگى بار ەكەنىن مالىمدەدى.
