اقش-تىڭ نەۆادا شتاتىنداعى بلەك-روك شولىندە ءوتىپ جاتقان Burning Man فەستيۆالىندە قازاقتىڭ كيىز ءۇيى قۇمدى داۋىلعا توتەپ بەردى، دەپ حابارلايدى "ادىرنا" ۇلتتىق پورتالى.
Travel And Tour World باسىلىمىنىڭ مالىمەتىنشە، قاتتى جەلدىڭ جىلدامدىعى ساعاتىنا 80 شاقىرىمعا دەيىن جەتىپ، بىرنەشە ارت-نىسانداردى قيراتقان.
داۋىل سالدارىنان كەمىندە ءتورت ادام جەڭىل جاراقات العان. بىرقاتار كەمپينگتەر قيراپ، قاتىسۋشىلارعا باسپانا ىزدەۋگە نەمەسە جابدىقتارىن جوندەۋگە تۋرا كەلگەن.
فەستيۆالگە العاش رەت قاتىسقان قازاقستاندىق دەلەگاتسيا ۇلتتىق مادەنيەتتى تانىستىرۋ ماقساتىندا كيىز ءۇي ورناتقان. توپ مۇشەسى سابينا وماردىڭ ايتۋىنشا، داۋىل كەزىندە كيىز ءۇي قاتىسۋشىلار ءۇشىن قاۋىپسىز ورىنعا اينالعان.
ء«بىز قازاق كيىز ۇيىنە تىعىلدىق، ەڭ دۇرىس شەشىم بولدى. سىرتتا الاي-دۇلەي بولىپ جاتقاندا، كيىز ءۇيدىڭ ىشىندە قاۋىپسىز بولدى. تاڭقالارلىعى، مادەنيەتىمىزدىڭ سيمۆولى قازاق كيىز ءۇيى امەريكا ءشولىنىڭ قاق ورتاسىنداعى قۇمدى داۋىلدا قورعان بولعانى»، – دەپ جازدى ول.
داۋىلدان كەيىن ءىس-شارا كەلەسى كۇنى جالعاسىن تاپتى. سينوپتيكتەر نايزاعاي مەن شاعىن تاسقىن بولۋى مۇمكىن ەكەنىن ەسكەرتتى.
فەستيۆالدىڭ ۇيىمداستىرۋشىلارىنىڭ دەرەگىنشە، قيىندىقتارعا قاراماستان، Burning Man 2025-كە كەلۋشىلەر سانى ارتىپ، شامامەن 72 مىڭ ادام جينالعان.
Burning Man – جىل سايىن وتەتىن سەگىز كۇندىك فەستيۆال. قاتىسۋشىلار ۋاقىتشا قالا تۇرعىزىپ، ونەر مەن شىعارماشىلىق جۇمىستارىن ۇسىنادى. بيىلعى ءىس-شارا 1 قىركۇيەككە دەيىن جالعاسادى.
