اباي كىتاپحاناسىندا «ۇلتتىق كىتاپ كۇنى» مەرەكەسىنە وراي «كىتاپحانا ءتۇنى» مەرەكەلىك ويىن-ساۋىق شاراسى ءوتتى.
اتالعان ءىس-شارانىڭ نەگىزگى ماقساتى – قوعامدا كىتاپ وقۋعا دەگەن قىزىعۋشىلىقتى ارتتىرۋ، كىتاپحانانىڭ زاماناۋي مۇمكىندىكتەرىن كەڭىنەن تانىستىرۋ، سونداي-اق ۇلتتىق جانە مادەني مۇرانى ناسيحاتتاۋ.
كەش باعدارلاماسى مازمۇندى ءارى كوپقىرلى فورماتتا ءوتىپ، كەلۋشىلەرگە ءتۇرلى تانىمدىق، شىعارماشىلىق جانە ينتەراكتيۆتى الاڭدار ۇسىنىلدى. اتاپ ايتقاندا:
- «ارتىق ءبىلىم كىتاپتا» اتتى كۆيز ويىنى;
- شەبەرلىك ساعاتتارى (سابىن ونىمدەرىن دايىنداۋ، جارىق شامدارىمەن اشىقحات جاساۋ، ءداستۇرلى شاي ءراسىمى، ولكەتانۋ جيىنتىقتارىنىڭ كورمەسى);
- ساندىك-قولدانبالى ونەر كورمەسى;
- «عاسىرلارمەن ۇندەسكەن اسىل قازىنا»، «اباي ەلى – اسىل ءسوزدىڭ مەكەنى»، «ادامزاتتىڭ ابايى» اتتى كەڭ كولەمدى كىتاپ كورمەلەرى;
- ۇلتتىق ويىندار;
- بيبليوتەراپەۆتيكالىق ترەنينگ;
- بي الاڭى مەن فلەشموب.
ءىس-شاراعا اباي وبلىسىنىڭ مادەنيەت، تىلدەردى دامىتۋ جانە ارحيۆ ءىسى باسقارماسى باسشىسىنىڭ ورىنباسارى ولجاس سوعىمباي، زيالى قاۋىم وكىلدەرى، مادەنيەت سالاسىنىڭ قىزمەتكەرلەرى، قالا جانە مەكتەپ كىتاپحاناشىلارى، ستۋدەنتتەر، اسكەري ءبولىم ساربازدارى مەن كىتاپحانا وقىرماندارى قاتىستى.
سالتاناتتى اشىلۋ ءراسىمى اياسىندا ءا.قاشاۋباەۆ اتىنداعى مەملەكەتتىك فيلارمونيا انشىلەرى مەن بيزنەس جانە سەرۆيس كوللەدجىنىڭ ستۋدەنتتەرى ونەر كورسەتىپ، مەرەكەلىك كەشتىڭ شىرايىن كىرگىزدى.
كەش اياسىندا ۇيىمداستىرىلعان «ارتىق ءبىلىم كىتاپتا» اتتى كۆيز ويىنىنا 10 كوماندا قاتىسىپ، ءوزارا سايىسقا ءتۇستى. اتاپ ايتقاندا، اباي وبلىسىنىڭ لينگۆيستيكالىق ورتالىعىنىڭ «ىعاي مەن سىعاي» توبى I ورىن السا، سەمەي قالاسىنىڭ
ورتالىقتاندىرىلعان كىتاپحانا جۇيەسىنىڭ «كىتاپحانا زياتكەرلەرى» توبى II ورىندى يەلەندى. ال مەكتەپ كىتاپحاناشىلارىنان قۇرىلعان «سامعاۋ» توبى» III ورىندى قانجىعاسىنا بايلادى.
«كىتاپحانا ءتۇنى» شاراسى كىتاپحانا قىزمەتىن تانىستىرىپ قانا قويماي، رۋحاني قۇندىلىقتاردى دارىپتەۋگە، وقىرمان مەن كىتاپحانا اراسىنداعى بايلانىستى نىعايتۋعا ىقپال ەتتى.
ريما قاناپياقىزى،
اباي اتىنداعى وبلىستىق امبەباپ كىتاپحاناسىنىڭ
دامىتۋ ءبولىمىنىڭ باسشىسى
