باتىس قازاقستان وبلىسىندا كوممۋنالدىق ينفراقۇرىلىمدى جاڭعىرتۋ جۇمىستارى جالعاسۋدا. ورال قالاسىندا №29 كارىز سورعى ستانتسياسىن قايتا جاڭارتقاننان كەيىن 50 مىڭ تۇرعىن تۇراقتى سۋ بۇرۋ جۇيەسىمەن قامتىلسا، 10 مىڭنان استام ادام تۇراقتى جىلۋمەن قامتاماسىز ەتىلەدى. سونداي-اق 165 شاقىرىم ەلەكتر جەلىسىن جاڭارتۋ جوسپارلانىپ جاتىر. بۇل تۋرالى باق وكىلدەرىنە ارنالعان ءباسپاسوز تۋرى بارىسىندا ايتىلدى، شارا اياسىندا 4 نەگىزگى جوبا كورسەتىلدى.
نەگىزگى نىسانداردىڭ ءبىرى قۇنى 1,8 ملرد تەڭگە بولاتىن № 29 كارىزدىك سورعى ستانتسياسىن قايتا قۇرۋ. جوبا اياقتالعاننان كەيىن 50 مىڭ تۇرعىن جانە 39 الەۋمەتتىك نىسان تۇراقتى سۋ بۇرۋمەن قامتاماسىز ەتىلەدى. بۇدان باسقا، جاڭا ابونەنتتەردى قوسۋ مۇمكىندىگى پايدا بولادى. قازىرگى كەزدە ستانتسيانىڭ جاڭا عيماراتىنىڭ سالىنىپ جاتىر.
وبلىس ورتالىعىندا قالانىڭ نەگىزگى جىلۋ جەلىلەرىنىڭ ءبىرى – جم-7 ماگيسترالىن قايتا قۇرۋ جۇمىستارى جالعاسۋدا. جوبا اياسىندا 1,8 شاقىرىمعا جۋىق قۇبىر اۋىستىرىلادى. بۇل جەلىلەر كۇردەلى جوندەۋسىز 35 جىلدان استام ۋاقىت بويى پايدالانىلىپ كەلگەن. جوبانىڭ قۇنى 2,6 ملرد تەڭگە. ناتيجەسىندە 130 كوپپاتەرلى تۇرعىن ءۇي (10,1 مىڭ تۇرعىن) مەن 24 الەۋمەتتىك نىسان تۇراقتى جىلۋمەن قامتاماسىز ەتىلەدى.
زاشاعان كەنتىندە قۋاتى 4 مۆت «سانشكولا» قازاندىعىن جاڭعىرتۋ جۇمىستارى اياقتالدى. قۇنى 229,3 ملن تەڭگەنى قۇرايتىن نىسان وتكەن جىلىتۋ ماۋسىمىندا ەكى مەكتەپتى، پوليتسيا ءبولىمىن جانە «قازاقتەلەكوم» اق فيليالىن تۇراقتى جىلۋمەن قامتاماسىز ەتتى.
سونىمەن قاتار، ەلەكتر جەلىلەرىن قايتا قۇرۋ جوباسى وبلىستىڭ 6 اۋدانىندا جانە 31 ەلدى مەكەندە ىسكە اسىرىلۋدا. جەكە جوبا اياسىندا ورالدا قۇنى 3,5 ملرد تەڭگە بولاتىن 165 كم 0,4 كۆ اۋە جەلىسىن اۋىستىرۋ جوسپارلانعان. بۇل ەلەكترمەن جابدىقتاۋدىڭ سەنىمدىلىگىن ارتتىرىپ، قالا بويىنشا جەلىلەردىڭ توزۋىن 5%-عا جانە وبلىس بويىنشا 1,13%-عا تومەندەتۋگە مۇمكىندىك بەرەدى.
ماسەلەن، 1962 جىلدان بەرى پايدالانىلىپ كەلە جاتقان جانە كۇردەلى جوندەۋ كورمەگەن كرۋگلووزەرنوە كەنتىندەگى ەلەكتر جەلىلەرىن جاڭعىرتۋ جوسپارلانۋدا. بۇل شارا 700-گە جۋىق ابونەنتتى قامتىپ، ولاردى تۇراقتى ەلەكتر قۋاتىمەن قامتاماسىز ەتەدى. قايتا قۇرۋعا دەيىن بۇل ۋچاسكەدە جىل سايىن 25-كە جۋىق ءوشىرۋ تىركەلگەن.
ايتا كەتەيىك، 2026 جىلى باتىس قازاقستان وبلىسىندا ەكسج ۇلتتىق جوباسى اياسىندا كوممۋنالدىق ينفراقۇرىلىمدى جاڭعىرتۋ بويىنشا 10 جوبا جۇزەگە اسىرىلۋدا. ونىڭ ىشىندە 1113 كم ەلەكتر جەلىسى مەن 2 قوسالقى ستانتسيانى قايتا جاڭارتۋ كوزدەلگەن. جوبالاردىڭ جالپى قۇنى 16,5 ملرد تەڭگە، ونىڭ ىشىندە بيىل 4,7 ملرد تەڭگە كولەمىندە قارجىلاندىرۋ قاراستىرىلعان. جوبالاردى ورال قالاسى مەن 74 اۋىلدىق ەلدى مەكەندە ىسكە اسىرۋ جوسپارلانعان.
جالپى ءوڭىر بويىنشا ينجەنەرلىك ينفراقۇرىلىمدى جاڭعىرتۋ جوبالارى اياسىندا 509 كم ەلەكتر جەلىسىن، 12,4 كم جىلۋ جەلىسىن جانە 5,6 كم سۋ قۇبىرى جەلىسىن قايتا جاڭارتۋ كوزدەلگەن.
