ورالدا بقو اكىمدىگى مەن پروكۋراتۋراسىنىڭ ۇيىمداستىرۋىمەن ء«وسۋ كاپيتالى: ايماقتىڭ جاڭا مۇمكىندىكتەرى» اتتى ينۆەستيتسيالىق فورۋم ءوتتى.
ماڭىزدى جيىننىڭ ماقساتى – بيزنەس قاۋىمداستىقپەن ءوزارا ءىس-قيمىلدى نىعايتۋ جانە ينۆەستورلاردىڭ قۇقىعىن قورعاۋ. ءىس-شاراعا ايماق باسشىسى ناريمان تورەعاليەۆ، وبلىس پروكۋرورى نۇربەك ۇلاسبەكۇلى، قر باس پروكۋراتۋراسىنىڭ ينۆەستورلاردىڭ قۇقىقتارىن قورعاۋ جونىندەگى كوميتەت توراعاسىنىڭ ورىنباسارى ازامات دۇيسەمبەكوۆ، ونەركاسىپ كوميتەتى توراعاسىنىڭ ورىنباسارى مۇحامەد انداقوۆ جانە وڭىرلىك كاسىپكەرلەر كەڭەسىنىڭ توراعاسى مۇرات جاقىباەۆ قاتىستى.
فورۋم ايماقتاعى وقۋ ورىندارى مەن ىرگەلى كاسىپورىنداردىڭ يننوۆاتسيالىق جوبالار كورمەسىمەن اشىلدى. وندا ينۆەستورلار تىڭ باستامالارىن تانىستىرىپ، ەكونوميكالىق تيىمدىلىگىنە نازار اۋدارتتى. رەسمي بولىمدە ايماقتىڭ ينۆەستيتسيالىق الەۋەتى تۋرالى بەينەروليك كورسەتىلىپ، جوبالاردىڭ ناقتى ناتيجەلەرى باياندالدى.
وبلىس اكىمى ناريمان تورەعاليەۆ وڭىردە ينۆەستورلاردىڭ قۇقىعىن قورعاۋ جانە قولايلى ينۆەستيتسيالىق احۋال قالىپتاستىرۋ بويىنشا كەشەندى ءىس-شارالار اتقارىلىپ جاتقانىن اتاپ ءوتتى.
- مەملەكەت باسشىسى ينۆەستيتسيا تارتۋ ءىسىن جۇيەلى جولعا قويىپ، جوبالاردى ءارتاراپتاندىرۋ جونىندە ناقتى تاپسىرمالار بەردى. كەشەندى جۇمىستار مەن كەلىسسوزدەر ناتيجەسىندە كەيىنگى 3 جىلدا ءوڭىر ەكونوميكاسىنا 2,3 ترلن تەڭگە ينۆەستيتسيا تارتىلدى. پروكۋراتۋرا ورگاندارىمەن بىرلەسە وتىرىپ، ينۆەستورلاردىڭ قۇقىعىن قورعاۋ شارالارىن جالعاستىرا بەرەمىز. جاڭا جۇمىس ورىندارىنىڭ اشىلۋى تۇرعىنداردىڭ تابىسىن ارتتىرىپ، الەۋمەتتىك-ەكونوميكالىق دامۋعا سەرپىن بەرەدى»، — دەدى ناريمان تورەعاليەۆ.
فورۋمدا جىلىنا 100 مىڭ توننا قوقىس وڭدەيتىن زاۋىت سالۋ، گازتۋربينالىق ەلەكتر ستانساسىنىڭ قۇرىلىسى، «ەۋرازيا» لوگيستيكالىق حابىن قۇرۋ، فارماتسەۆتيكالىق پرەپاراتتار شىعارۋ سياقتى وڭتۇستىك كورەيالىق، قىتايلىق جانە رەسەيلىك كومپانيالاردىڭ قاتىسى بار ءىرى جوبالار تالقىلاندى.
جيىن سوڭىندا قالدىقتاردى وڭدەۋ، ەنەرگەتيكا، قوناق ءۇي بيزنەسى جانە قۇس فابريكاسىن سالۋ بويىنشا ىنتىماقتاستىق جونىندەگى ماڭىزدى مەموراندۋمدارعا قول قويىلدى. قۇرىلىس، ماشينا جاساۋ، مەتاللۋرگيا جانە تۋريزم سالالارىنىڭ دامۋىنا ۇلەس قوسقان بىرقاتار كومپانيا باسشىلارى ارنايى ماراپاتتارعا يە بولدى.
