فوتو:kremlin.ru
9 مامىردا ماسكەۋ قالاسىندا وتەتىن جەڭىس پارادى قاۋىپسىزدىك شارالارى كۇشەيتىلگەن جاعدايدا ۇيىمداستىرىلماق. رەسەي بيلىگى سوڭعى جىلدارى العاش رەت قىزىل الاڭداعى اسكەري شەرۋگە اۋىر برونەتەحنيكا مەن زىمىران كەشەندەرى قاتىسپايتىنىن حابارلادى. سونداي-اق، شەرۋگە كەلەتىن قوناقتار تىزىمىندە ورتالىق ازيا مەملەكەتتەرىنىڭ باسشىلارى جوق، دەپ حابارلايدى “ادىرنا” ۇلتتىق پورتالى Fergana اگەنتتىگىنە سىلتەپ.
رەسەي تاراپى بۇل شەشىمدى «قازىرگى جەدەل احۋالمەن» تۇسىندىرسە، ۋكراينا مەن بىرقاتار باتىستىق باسىلىمدار ونى ۋكراينالىق درون شابۋىلدارىنان قورعانۋ ارەكەتىمەن بايلانىستىرۋدا. سوڭعى ايلاردا ماسكەۋ قالاسى مەن وبلىسىندا بىرنەشە مارتە ۇشقىشسىز اپپاراتتارعا قارسى اۋە شابۋىلىنا قارسى قورعانىس جۇيەلەرى ىسكە قوسىلعانى بەلگىلى.
ۋكراينا پرەزيدەنتى ۆلاديمير زەلەنسكي ەرەۆاندا وتكەن ەۋروپالىق ساياسي قاۋىمداستىق سامميتىندە رەسەيدىڭ اسكەري تەحنيكانى كورسەتۋدەن باس تارتۋىن «السىزدىكتىڭ بەلگىسى» دەپ باعالادى. ونىڭ ايتۋىنشا، كرەمل قىزىل الاڭ ماڭىنداعى ىقتيمال درون شابۋىلدارىنان قاۋىپتەنىپ وتىر.
ال رەسەي قورعانىس مينيسترلىگى مەرەكەلىك شارانى بۇزۋعا باعىتتالعان كەز كەلگەن ارەكەتكە قاتاڭ جاۋاپ بەرىلەتىنىن مالىمدەدى. مەملەكەتتىك دۋما دەپۋتاتى اندرەي كولەسنيك تە قاۋىپ تۋىنداعان جاعدايدا جاۋاپ «دەرەۋ ءارى قاتاڭ» بولاتىنىن ايتتى.
وسىعان بايلانىستى كرەمل 9 مامىر مەرەكەسىنە قاتىساتىن شەتەلدىك دەلەگاتسيالار ءتىزىمىن جاريالادى. الايدا تىزىمدە ورتالىق ازيا مەملەكەتتەرى – قازاقستان، وزبەكستان، قىرعىزستان، تاجىكستان جانە تۇرىكمەنستان باسشىلارىنىڭ اتى اتالماعان.
بۇعان دەيىنگى جىلدارى اتالعان ەلدەردىڭ ليدەرلەرى ماسكەۋدەگى جەڭىس پارادىنا تۇراقتى تۇردە قاتىسىپ كەلگەن ەدى. بيىل ولاردىڭ كەلمەۋى ساراپشىلار تاراپىنان ايماقتاعى ساياسي ساقتىقپەن جانە قاۋىپسىزدىك ماسەلەلەرىمەن بايلانىستىرىلىپ وتىر.
