مامىر ايىنىڭ ەكىنشى جەكسەنبىسىندە ەلىمىزدە جۇرەككە جىلۋ سىيلايتىن ەرەكشە مەرەكەلەردىڭ ءبىرى – انالار كۇنى اتاپ وتىلەدى. بۇل كۇن انانىڭ ادام ومىرىندەگى ورنى مەن قوعامداعى ءرولىن ايشىقتايتىن ماڭىزدى مەرەكە سانالادى.
انا – وتباسىنىڭ بەرەكەسى مەن ۇيىتقىسى عانا ەمەس، ۇرپاق تاربيەسىنە، رۋحاني قۇندىلىقتاردىڭ قالىپتاسۋىنا ىقپال ەتەتىن باستى تۇلعا.
انالار كۇنى الەمنىڭ كوپتەگەن ەلىندە كەڭىنەن تويلانادى. اتاپ ايتقاندا، اقش، كانادا، گەرمانيا، يتاليا، تۇركيا، جاپونيا، برازيليا جانە اۋستراليا سياقتى 20-دان استام مەملەكەتتە مەرەكە مامىر ايىنىڭ ەكىنشى جەكسەنبىسىنە بەلگىلەنگەن. قازاقستاندا دا بۇل كۇننىڭ ماڭىزى ەرەكشە. ول انا مارتەبەسىن دارىپتەپ، وتباسى قۇندىلىقتارىن ناسيحاتتاۋعا باعىتتالعان.
مەملەكەت تاراپىنان انالاردى قولداۋ مەن قورعاۋ الەۋمەتتىك ساياساتتىڭ باسىم باعىتتارىنىڭ ءبىرى بولىپ سانالادى. سەبەبى انا – تەك وتباسىنىڭ تىرەگى عانا ەمەس، ۇلتتىق قۇندىلىقتار مەن ىزگى تاربيەنى ۇرپاق بويىنا سىڭىرەتىن نەگىزگى تۇلعا.
وسى باعىتتا قازاقستان حالقى اسسامبلەياسى جانىنان قۇرىلعان «انالار كەڭەسى» بەلسەندى جۇمىس اتقارىپ كەلەدى. قازىرگى تاڭدا كەڭەستىڭ رەسپۋبليكا بويىنشا 1713 بولىمشەسى بار. ونىڭ ىشىندە 17 وبلىستىق، 56 قالالىق، 159 اۋداندىق جانە 1481 اۋىلدىق بولىمشە قىزمەت ەتەدى. كەڭەس قۇرامىندا 16 مىڭنان استام ايەل بار.
«انالار كەڭەسى» وتباسى ينستيتۋتىن نىعايتۋعا، جاستار تاربيەسىنە، ۇلتتىق سالت-ءداستۇر مەن وتباسىلىق قۇندىلىقتاردى دارىپتەۋگە ءوز ۇلەسىن قوسىپ كەلەدى.
وسىناۋ مەرەكەلى كۇنى بارشا انالارعا زور دەنساۋلىق، اماندىق پەن باق-بەرەكە تىلەيمىز. ءار شاڭىراقتا شاتتىق پەن سىيلاستىق ورناپ، بالالار اتا-اناسىنىڭ ماقتانىشىنا اينالا بەرسىن.
