9 مامىردا قىرعىزستاننىڭ قاراقول قالاسىندا (بۇرىنعى پرجەۆالسك) وتكەن مەرەكەلىك كونتسەرت الەۋمەتتىك جەلىلەردە ۇلكەن داۋ تۋعىزدى. ءىس-شاراعا رەسەيلىك «ليۋبە» توبى، ءانشى نيكولاي باسكوۆ جانە «بلەستياششيە» توبى قاتىسقان، دەپ حابارلايدى "ادىرنا" ۇلتتىق پورتالى فەرعانا اگەنتتىگىنە سىلتەپ.
كونتسەرتتىڭ بەزەندىرىلۋى مەن جالپى اتموسفەراسى كوپشىلىكتىڭ نارازىلىعىن تۋدىردى. الەۋمەتتىك جەلى قولدانۋشىلارى ساحنادا جانە ءىس-شارا اۋماعىندا «Z» تاڭبالارى، «گەورگي» لەنتالارى جانە اسكەري تەحنيكانىڭ بەينەلەرى كەڭىنەن قولدانىلعانىن جازۋدا. كەيبىر پىكىر يەلەرى مۇنداي سيمۆوليكانى رەسەيدىڭ ۋكرايناداعى سوعىسىمەن بايلانىستىرىپ، كونتسەرتتى «ساياسي ناسيحات ەلەمەنتتەرى بار شارا» دەپ باعالاعان.
جەلى قولدانۋشىلارى كونتسەرتتى ۇيىمداستىرۋشىلاردىڭ ارەكەتىنە قۇقىقتىق باعا بەرۋدى تالاپ ەتىپ جاتىر. سونىمەن قاتار، كوپشىلىك «ليۋبە» توبىنىڭ جەتەكشىسى نيكولاي راستورگۋەۆ بۇعان دەيىنگى سۇحباتتارىندا قازاقستان تۋرالى داۋلى پىكىرلەر ايتقانىن ەسكە سالۋدا. اتاپ ايتقاندا، الەۋمەتتىك جەلىلەردە ونىڭ قازاقتاردى «رۋسوفوبياعا» ايىپتاپ، «ەگەر پۋتين بولماسا، ونىڭ مۇراگەرى تاربيەلىك شارالار قولدانادى» دەگەن ءسوزى كەڭىنەن تالقىلانۋدا.
پىكىر بىلدىرۋشىلەر بۇل مالىمدەمەنى رەسەيدىڭ ۋكراينا، شەشەنستان جانە گرۋزياداعى ارەكەتتەرىمەن بايلانىستىرىپ، ونى كورشى ەلدەرگە باعىتتالعان استارلى قاۋىپ رەتىندە قابىلداپ وتىرعاندارىن جازۋدا.
قازىرگى ۋاقىتتا قىرعىزستان بيلىگى نەمەسە كونتسەرت ۇيىمداستىرۋشىلارى اتالعان سىن-پىكىرلەرگە قاتىستى رەسمي تۇسىنىكتەمە بەرگەن جوق. الايدا وقيعا ورتالىق ازيا ەلدەرىندەگى قوعامدىق كوڭىل-كۇي، مادەني ءىس-شارالاردىڭ ساياسيلانۋى جانە اقپاراتتىق ىقپال ماسەلەلەرى جونىندەگى پىكىرتالاستى قايتا كۇشەيتتى.
