باتكەن وبلىسىندا قىرعىزستان مەن وزبەكستاننىڭ جەر ۋچاسكەلەرىن ايىرباستاۋعا قاتىستى ۇيىمداستىرۋشىلىق-تەحنيكالىق ماسەلەلەر جونىندەگى بىرلەسكەن جۇمىس كوميسسياسىنىڭ وتىرىسى ءوتتى، دەپ حابارلايدى «ادىرنا» ءتىلشىسى Darya اگەنتتىگىنە سىلتەمە جاساپ.
تاراپتار بۇعان دەيىن قول جەتكىزىلگەن كەلىسىمدەردىڭ ورىندالۋىن تالقىلاعان. اتاپ ايتقاندا، ايىرباستالاتىن اۋماقتار تۇرعىندارىنىڭ ازاماتتىعى، ولاردى قونىستاندىرۋ، سونداي-اق مۇلىكتىك-شارۋاشىلىق جانە وزگە دە ماسەلەلەر قارالعان.
قىرعىز تاراپىنىڭ كوميسسياسىن ءمينيستردىڭ ءبىرىنشى ورىنباسارى قامچىبەك دوسماتوۆ، ال وزبەك تاراپىنىڭ كوميسسياسىن وزبەكستان ىشكى ىستەر ءمينيسترىنىڭ ءبىرىنشى ورىنباسارى بوتير قۇدراتحودجاەۆ باسقارعان.
وتىرىس قورىتىندىسى بويىنشا ەكى ەلدىڭ سالالىق مينيسترلىكتەرى، ۆەدومستۆولارى جانە جەرگىلىكتى اتقارۋشى ورگاندارىنىڭ وكىلدەرىنەن قۇرالعان بىرلەسكەن جۇمىس توبىنىڭ قۇرامى بەكىتىلگەن.
جۇمىس توبى ايىرباستالاتىن اۋماقتار تۇرعىندارىنىڭ ازاماتتىعىنا قاتىستى ماسەلەلەردى، قونىس اۋدارۋدى ۇيىمداستىرۋدى، مەملەكەتتىك مۇلىك نىساندارىن قابىلداۋ مەن تاپسىرۋدى، ازاماتتاردىڭ مۇلىكتىك قۇقىقتارىن راسىمدەۋدى، جەر پايدالانۋ جانە حالىقتى الەۋمەتتىك قورعاۋ ماسەلەلەرىن قاراستىرادى. سونىمەن قاتار اتالعان اۋماقتار تۇرعىندارى ءۇشىن ءبىلىم بەرۋ پروتسەسىنىڭ ۇزدىكسىزدىگى قامتاماسىز ەتىلەدى.
قازىرگى ۋاقىتتا جۇمىس توبى پراكتيكالىق قىزمەتىنە كىرىسكەن. ونىڭ وكىلدەرى ايىرباستالاتىن اۋماقتارعا بارىپ، اتقارىلعان جۇمىستار مەن قول جەتكىزىلگەن ناتيجەلەر تۋرالى كوميسسيانىڭ تەڭ توراعالارىنا تۇراقتى تۇردە ەسەپ بەرىپ وتىرماق.
