الماتى قالاسىندا جەتى جاستاعى ايزەرە يبراەۆانىڭ ولىمىنە سەبەپ بولعان جۇك كولىگىنىڭ جۇرگىزۋشىسى مەرزىمىنەن بۇرىن بوستاندىققا شىقتى، دەپ حابارلايدى "ادىرنا" ۇلتتىق پورتالى.
باق-تا تاراعان مالىمەتكە سايكەس، سوت جۇرگىزۋشىنىڭ جازاسىنىڭ وتەلمەگەن بولىگىن ايىپپۇلمەن الماستىرۋ تۋرالى شەشىم قابىلداعان.
قايعىلى وقيعا وتكەن جىلدىڭ 2 ساۋىرىندە الماتىنىڭ قاراسۋ شاعىناۋدانىندا بولعان. ساباقتان ۇيىنە قايتىپ كەلە جاتقان جەتى جاستاعى وقۋشى جاياۋ جۇرگىنشىلەر وتكەلى ارقىلى جولدان وتپەك بولعان. سول ساتتە قارسى بەتتە قىزدىڭ اناسى كۇتىپ تۇرعان. كەنەت جولعا اۆتوبۋس شىعىپ كەتكەننەن كەيىن قورقىپ قالعان بالا ارتقا شەگىنگەن. وسى كەزدە «رەنو» ماركالى جۇك كولىگى قوزعالىپ كەتىپ، قىزدى قاعىپ كەتكەن. وقۋشى وقيعا ورنىندا كوز جۇمعان.
اتالعان دەرەك بويىنشا ابايسىزدا ادام ولىمىنە اكەلگەن جول قوزعالىسى ەرەجەسىن بۇزۋ فاكتىسى بويىنشا قىلمىستىق ءىس قوزعالعان. 66 جاستاعى جۇرگىزۋشى ەكى جىل التى ايعا باس بوستاندىعىنان ايىرىلعان ەدى. الايدا ءبىر جىلدان كەيىن جازانىڭ قالعان بولىگى ايىپپۇلمەن الماستىرىلىپ، جۇرگىزۋشى بوساتىلعان. سونىمەن قاتار ول بەس جىل مەرزىمگە كولىك جۇرگىزۋ قۇقىعىنان ايىرىلدى.
باستاپقىدا مارقۇم قىزدىڭ اتا-اناسى 18,2 ميلليون تەڭگە كولەمىندە مورالدىق وتەماقى تالاپ ەتكەن. الايدا اپەللياتسيالىق سوت بۇل سومانى 5,5 ميلليون تەڭگەگە دەيىن قىسقارتقان.
