قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ «قازاقستان رەسپۋبليكاسىنىڭ ورتا ءبىلىم بەرۋ جۇيەسىنە جاساندى ينتەللەكتتى ەنگىزۋ جونىندەگى شارالار تۋرالى» جارلىققا قول قويدى.
جارلىقتىڭ نەگىزگى ماقساتى – جاساندى ينتەللەكتتىڭ قارقىندى دامۋى جاعدايىندا قازاقستاننىڭ تۇراقتى دامۋىن قامتاماسىز ەتۋ جانە ادامي كاپيتالدىڭ نەگىزگى ەلەمەنتى رەتىندە زاماناۋي، يننوۆاتسيالىق ءبىلىم بەرۋ جۇيەسىن قالىپتاستىرۋ.
قۇجاتقا سايكەس، 2026 جىلعى 1 شىلدەگە دەيىن ۇكىمەت 2026–2029 جىلدارعا ارنالعان ورتا ءبىلىم بەرۋ جۇيەسىنە جاساندى ينتەللەكتتى كەڭىنەن ەنگىزۋ جونىندەگى كەشەندى ءىس-شارالار جوسپارىن بەكىتەدى. جوسپار اياسىندا جەكە وقىتۋ جۇيەسىن دامىتۋ، تسيفرلىق ينفراقۇرىلىمدى جەتىلدىرۋ، پەداگوگ كادرلاردى دايارلاۋ جانە وقۋشىلاردىڭ دەربەس دەرەكتەرىن قورعاۋ تەتىكتەرىن ەنگىزۋ كوزدەلگەن.
سونىمەن قاتار جارلىقتا جاساندى ينتەللەكتتى دامىتۋ جونىندەگى كەڭەستىڭ مۇشەسى لي كاي-فۋ ۇسىنعان ۇسىنىستاردى تاجىريبەدە قولدانۋ قاراستىرىلعان. ۇكىمەتكە 2026 جىلعى 1 ماۋسىمعا دەيىن ورتا ءبىلىم بەرۋ سالاسىندا پيلوتتىق جوبانى ىسكە اسىرۋ بويىنشا ناقتى ۇسىنىستار ازىرلەۋ تاپسىرىلدى. بۇل جوبانى كەيىننەن بۇكىل ەل بويىنشا كەڭەيتۋ جوسپارلانعان.
جاڭا باستامالار قالا مەن اۋىل مەكتەپتەرى اراسىنداعى ءبىلىم ساپاسىنداعى الشاقتىقتى ازايتۋعا باعىتتالادى.
2026 جىلعى 1 تامىزعا دەيىن پيلوتتىق جوبا اياسىندا مەكتەپتەر قاجەتتى تەحنيكالىق جابدىقتارمەن، سونىڭ ىشىندە تۇراقتى جوعارى جىلدامدىقتى ينتەرنەتپەن قامتاماسىز ەتىلەدى.
ال 2026 جىلعى 1 قىركۇيەككە دەيىن ورتا ءبىلىم بەرۋ جۇيەسىندە جاساندى ينتەللەكتتى قولدانۋ ستاندارتتارى بەكىتىلەدى.
سونداي-اق وسى مەرزىمگە دەيىن پەداگوگتاردىڭ ۇزدىكسىز كاسىبي دامۋىن قامتاماسىز ەتەتىن ءىس-شارالار جوسپارى قابىلدانادى. قۇجاتتا جاساندى ينتەللەكت ءبىلىم بەرۋ ۇدەرىسىندە مۇعالىمدەردىڭ كاسىبي قىزمەتىن الماستىرماي، تەك قوسىمشا ءتيىمدى قۇرال رەتىندە قولدانىلۋى ءتيىس ەكەنى اتاپ وتىلگەن.
