Qazaqstan Respublikasynyŋ Prezidentı Qasym-Jomart Toqaev «Qazaqstan Respublikasynyŋ orta bılım beru jüiesıne jasandy intellekttı engızu jönındegı şaralar turaly» Jarlyqqa qol qoidy.
Jarlyqtyŋ negızgı maqsaty – jasandy intellekttıŋ qarqyndy damuy jaǧdaiynda Qazaqstannyŋ tūraqty damuyn qamtamasyz etu jäne adami kapitaldyŋ negızgı elementı retınde zamanaui, innovasiialyq bılım beru jüiesın qalyptastyru.
Qūjatqa säikes, 2026 jylǧy 1 şıldege deiın Ükımet 2026–2029 jyldarǧa arnalǧan orta bılım beru jüiesıne jasandy intellekttı keŋınen engızu jönındegı Keşendı ıs-şaralar josparyn bekıtedı. Jospar aiasynda jeke oqytu jüiesın damytu, sifrlyq infraqūrylymdy jetıldıru, pedagog kadrlardy daiarlau jäne oquşylardyŋ derbes derekterın qorǧau tetıkterın engızu közdelgen.
Sonymen qatar Jarlyqta jasandy intellekttı damytu jönındegı keŋestıŋ müşesı Li Kai-Fu ūsynǧan ūsynystardy täjıribede qoldanu qarastyrylǧan. Ükımetke 2026 jylǧy 1 mausymǧa deiın orta bılım beru salasynda pilottyq jobany ıske asyru boiynşa naqty ūsynystar äzırleu tapsyryldy. Būl jobany keiınnen bükıl el boiynşa keŋeitu josparlanǧan.
Jaŋa bastamalar qala men auyl mektepterı arasyndaǧy bılım sapasyndaǧy alşaqtyqty azaituǧa baǧyttalady.
2026 jylǧy 1 tamyzǧa deiın pilottyq joba aiasynda mektepter qajettı tehnikalyq jabdyqtarmen, sonyŋ ışınde tūraqty joǧary jyldamdyqty internetpen qamtamasyz etıledı.
Al 2026 jylǧy 1 qyrküiekke deiın orta bılım beru jüiesınde jasandy intellekttı qoldanu standarttary bekıtıledı.
Sondai-aq osy merzımge deiın pedagogtardyŋ üzdıksız käsıbi damuyn qamtamasyz etetın ıs-şaralar jospary qabyldanady. Qūjatta jasandy intellekt bılım beru üderısınde mūǧalımderdıŋ käsıbi qyzmetın almastyrmai, tek qosymşa tiımdı qūral retınde qoldanyluy tiıs ekenı atap ötılgen.
