فرانتسيا پرەزيدەنتى ەممانۋەل ماكروننىڭ جۇبايىنان «شاپالاق جەۋىنە» باسقا ايەلمەن حات الماسۋى سەبەپ بولعان. بۇل تۋرالى جۋرناليست فلوريان تارديف ايتتى، دەپ حابارلايدى «ادىرنا» ءتىلشىسى.
«بريجيت ماكرون بەلگىلى تۇلعانىڭ، فرانتسيادا تۇراتىن يرانتەكتى اكتريسانىڭ حابارلاماسىن كورگەن»، — دەدى ول RTL راديوسىنىڭ ەفيرىندە.
ءتارديفتىڭ ايتۋىنشا، ماكرون بىرنەشە اي بويى يراننان شىققان اكتريسا گۇلشيفتە فاراحانيمەن «پلاتوندىق قارىم-قاتىناستا» بولىپ، وعان جەكە سيپاتتاعى حابارلامالار جازىپ جۇرگەن. ءجۋرناليستىڭ پىكىرىنشە، ءدال وسى جاعداي ەرلى-زايىپتىلار اراسىنداعى «شيەلەنىسكە» سەبەپ بولىپ، پرەزيدەنتتىك ۇشاق بورتىندا جانجالعا ۇلاسقان.
بريجيت ماكروننىڭ اينالاسىنداعى ادامدار Le Parisien گازەتىنە بەرگەن سۇحباتىندا بۇل ايىپتاۋلاردى جوققا شىعارىپ، ءبىرىنشى حانىم ەشقاشان كۇيەۋىنىڭ تەلەفونىن تەكسەرمەيتىنىن ايتقان.
ەممانۋەل مەن بريجيت ماكروننىڭ قارىم-قاتىناسى ءبىر جىل بۇرىن ۆەتنامعا ساپارى كەزىندە باق نازارىن اۋدارعان. پرەزيدەنت ۇشاقتان شىققان ساتتە تۇسىرىلگەن ۆيدەودا ايەلى الاقانىمەن كۇيەۋىنىڭ بەتىن باسادى. مۇنداي جاعدايدى كۇتپەگەن فرانتسيا پرەزيدەنتى ابدىراپ، بىرنەشە سەكۋند بويى اڭ-تاڭ كۇيدە قالعان.
باستاپقىدا ەليسەي سارايى بۇل ۆيدەونى جوققا شىعارعان. كەيىن ماكروننىڭ اينالاسىنداعى دەرەككوزدەر مۇنى "وتباسىلىق جانجال" دەپ تۇسىندىرگەن. ال پرەزيدەنتتىڭ ءوزى «جاي عانا قالجىڭداستىق» دەپ تۇسىنىكتەمە بەرگەن.
گۇلشيفتە فاراحاني. Cۋرەت: woman.ru
