استاناداعى LRT جەلىسىندە جولاۋشىلاردىڭ قاۋىپسىزدىك ەرەجەلەرىن بۇزۋ فاكىلەرى تىركەلدى، دەپ حابارلايدى “ادىرنا” ۇلتتىق پورتالى.
بۇل تۋرالى City Transportation Systems (CTS) كومپانياسى حابارلادى.
كومپانيا مالىمەتىنشە، جولاۋشىلار ەش سەبەپسىز پلاتفورماداعى شۇعىل تەجەۋ باتىرماسىن باسىپ، پويىز ىشىندەگى پلاتفورمالىق ەسىكتەردى اپاتتى جاعدايدا اشۋ جۇيەسىن ىسكە قوسقان. سونداي-اق ۆاگون ەسىكتەرىن ءوز بەتىنشە اشۋعا تىرىسىپ، جابىلۋىنا كەدەرگى كەلتىرگەن جاعدايلار دا بولعان. وقيعا 17 مامىر تىركەلگەن. ال LRT 16 مامىر كۇنى عانا قولدانىسقا بەرىلگەن.
CTS وكىلدەرىنىڭ ايتۋىنشا، LRT جۇيەسى تولىقتاي اۆتوماتتاندىرىلعان. سوندىقتان مۇنداي ارەكەتتەردىڭ بارلىعى قاۋىپسىزدىككە تونگەن ىقتيمال قاۋىپ رەتىندە قابىلدانىپ، پويىزداردىڭ توقتاۋىنا جانە ديسپەتچەرلىك ورتالىق تاراپىنان قوسىمشا تەكسەرىستەر جۇرگىزىلۋىنە سەبەپ بولادى.
كومپانيا LRT جەلىسىنىڭ جوعارى كەرنەۋمەن جۇمىس ىستەيتىنىن ەسكە سالدى. ءار پويىز ىشىندە ارنايى وپەراتور بار. قاجەت بولعان جاعدايدا ول ەلەكتر قۋاتىن اجىراتقاننان كەيىن ەسىكتەردى ءوزى اشادى.
CTS جولاۋشىلاردى LRT پايدالانۋ ەرەجەلەرىن ساقتاۋعا شاقىردى. بارلىق زاڭبۇزۋشىلىقتار بەكەتتەر مەن ۆاگوندارداعى بەينەباقىلاۋ كامەرالارى ارقىلى انىقتالادى.
سونىمەن قاتار كومپانيا انىقتالعان قۇقىقبۇزۋشىلىقتار بويىنشا ماتەريالدار قۇقىق قورعاۋ ورگاندارىنا جولداناتىنىن مالىمدەدى. سەبەبى مۇنداي ارەكەتتەر جولاۋشىلارعا قاۋىپ ءتوندىرىپ، LRT جەلىسىنىڭ تۇراقتى جۇمىسىنا كەرى اسەر ەتەدى.
