الاتاۋ قالاسىنىڭ اسپانىندا بايقالعان ەرەكشە ۇشۋ اپپاراتى الەۋمەتتىك جەلى قولدانۋشىلارى اراسىندا قىزۋ تالقىعا ءتۇستى، دەپ حابارلايدى "ادىرنا" ۇلتتىق پورتالى.
كەيبىر تۇرعىندار ونى اسكەري درون نەمەسە جول ەرەجەسىن باقىلاۋعا ارنالعان قۇرىلعى دەپ بولجاعان. الايدا الماتى وبلىسى اكىمدىگى بۇل اپپاراتتىڭ اەروتاكسي ەكەنىن مالىمدەدى.
اكىمدىك مالىمەتىنشە، ۆيدەودا كورسەتىلگەن قۇرىلعى – AutoFlight كومپانياسىنىڭ جولاۋشىلار تاسىمالىنا ارنالعان eVTOL اپپاراتى. قازىر العاشقى سىناق ۇشۋلارى جۇرگىزىلىپ جاتىر.
"بۇل جۇمىستار قازاقستان مەن ورتالىق ازياداعى العاشقى دەمونستراتسيالىق ۇشۋعا دايىندىق اياسىندا جۇزەگە اسىرىلۋدا. ۇشۋ 2026 جىلعى 19 مامىرعا جوسپارلانعان", – دەپ حابارلادى اكىمدىكتىڭ ءباسپاسوز قىزمەتى.
جوبا اياسىندا الاتاۋدا جۇك جەتكىزۋگە ارنالعان ۇشقىشسىز جۇيەلەر مەن قالالىق اۋە قوزعالىسىن تسيفرلىق باسقارۋ تەحنولوگيالارى دا سىناقتان وتۋدە. جوباعا وڭتۇستىك كورەيا، يتاليا جانە قىتاي سەرىكتەستەرى قاتىسۋدا.
ۇيىمداستىرۋشى – Alatau Advance Air Group. بارلىق سىناق ۇشۋلارى ۋاكىلەتتى ورگاندارمەن كەلىسىلگەن.
