«تازا قازاقستان» رەسپۋبليكالىق ەكولوگيالىق اكتسياسى اياسىندا وبلىس اۋماعىندا قورشاعان ورتانى قورعاۋ، تازالىق مادەنيەتىن قالىپتاستىرۋ جانە قوعامدىق ورىنداردى اباتتاندىرۋ باعىتىندا اۋقىمدى ەكولوگيالىق ءىس-شارالار ءوتتى. اكتسيالار بارىسىندا تۇرعىندار، جاستار جانە ەرىكتىلەر بەلسەندىلىك تانىتىپ، تۋعان جەردىڭ تازالىعىنا ءوز ۇلەستەرىن قوستى.
تاراز قالاسىنداعى «تالاس» وزەنىنىڭ جاعالاۋىندا وتكەن ەكولوگيالىق اكتسيا وڭىردەگى ماڭىزدى تازالىق شارالارىنىڭ بىرىنە اينالدى. ءىس-شارا بارىسىندا وزەن جاعالاۋى تۇرمىستىق قالدىقتاردان تازارتىلىپ، دەمالىس ايماقتارى رەتكە كەلتىرىلدى. تابيعي اۋماقتىڭ تازالىعىن ساقتاۋ مەن ەكولوگيالىق مادەنيەتتى قالىپتاستىرۋعا باعىتتالعان اكتسياعا جاستار ۇيىمدارى، ەرىكتىلەر جانە بەلسەندى تۇرعىندار قاتىستى.
شارا بارىسىندا وبلىستىق جاستار رەسۋرستىق ورتالىعى ديرەكتورىنىڭ ورىنباسارى م. مىرزاتاي ەكولوگيالىق باستامالاردىڭ ماڭىزدىلىعىنا توقتالىپ:
«تازا قازاقستان» اكتسياسى – قورشاعان ورتانى قورعاۋعا باعىتتالعان ماڭىزدى باستاما. اسىرەسە، وزەن-كولدەردىڭ تازالىعى – ەكولوگيالىق قاۋىپسىزدىكتىڭ باستى كەپىلى. تالاس وزەنىنىڭ جاعالاۋىن تازارتۋ ارقىلى ءبىز تۇرعىنداردى تابيعاتتى ايالاۋعا، تۋعان جەرگە جاناشىرلىقپەن قاراۋعا ۇندەيمىز. مۇنداي شارالار جاستاردىڭ ەكولوگيالىق مادەنيەتىن قالىپتاستىرىپ، قوعامداعى جاۋاپكەرشىلىكتى ارتتىرا تۇسەدى»، – دەدى.
سونىمەن قاتار، مەركى اۋدانىنداعى مەركى تاۋ شاتقالىندا «تازا قازاقستان – جارقىن بولاشاق كەپىلى»، قورداي اۋدانىنداعى «ەمەن» ورتالىق ساياباعىندا «تۋعان جەردىڭ تازالىعى – اركىمنىڭ جاۋاپكەرشىلىگى»، شۋ قالاسىنداعى «تەمىرجولشىلار» ساياباعىندا «تازالىق – ورتاق جاۋاپكەرشىلىك»، تالاس اۋدانى قاراتاۋ قالاسىنداعى «جارتاس» كولدەرىندە «تازا كول، تازا ەل»، سونداي-اق تاراز قالاسىنداعى «جەڭىس» ساياباعىندا «تازا اۋلا» تاقىرىپتارىندا ەكولوگيالىق سەنبىلىكتەر ۇيىمداستىرىلدى.
سەنبىلىكتەر بارىسىندا قوعامدىق ورىندار مەن دەمالىس اۋماقتارى تازارتىلىپ، قوقىس قالدىقتارى شىعارىلدى. تابيعي اۋماقتاردى قورعاۋ، كوگالداندىرۋ جانە اباتتاندىرۋ جۇمىستارى جۇرگىزىلىپ، تۇرعىندارعا تازالىق ساقتاۋ مەن ەكولوگيالىق جاۋاپكەرشىلىكتىڭ ماڭىزى ءتۇسىندىرىلدى.
سونىمەن قاتار، جۋالى اۋدانىنداعى ورتالىق ساياباقتا «جاسىل قازاقستان – ءبىزدىڭ تاڭداۋىمىز!» تاقىرىبىندا ەكولوگيالىق اكتسيا ۇيىمداستىرىلىپ، قاتىسۋشىلار ساياباق اۋماعىن تازالاۋ جانە كوگالداندىرۋ جۇمىستارىنا اتسالىستى.
ال، تاراز قالاسىنداعى №125 High School ءبىلىم وشاعىندا «تازا تابيعات – ورتاق مىندەت!» اتتى ەكولوگيالىق كەزدەسۋ ءوتىپ، جاستار اراسىندا تابيعاتتى قورعاۋ مادەنيەتىن قالىپتاستىرۋ، قورشاعان ورتاعا جاناشىرلىقپەن قاراۋ ماسەلەلەرى كەڭىنەن تالقىلاندى.
جالپى، بۇگىنگى كۇنگە «تازا قازاقستان» اكتسياسىنا 22,5 مىڭنان اسا ادام جانە 850 كاسىپورىندار مەن مەكەمەلەر قاتىستى. ءىس-شارالار اياسىندا 45,9 مىڭ جاسىل جەلەكتەر وتىرعىزىلىپ، 2,6 مىڭ شاقىرىم كوشە جولدارى، 810 شاقىرىم ارىق جۇيەلەرى مەن كانالدار، سونداي-اق 615,5 مىڭ م² ساياباقتار مەن سكۆەرلەر اۋماقتارى تازالاندى، 5,2 مىڭ توننا كۇل-قوقىس شىعارىلدى.
