فوتو: قۋانىشبەك قاري
قىرعىزستان تاۋىندا قازا تاپقان ءالپينيستىڭ دەنەسىن ەۆاكۋاتسيالاۋ قايتا قارالىپ جاتىر، دەپ حابارلايدى "ادىرنا" ۇلتتىق پورتالى.
قىرعىزستاننىڭ توتەنشە جاعدايلار مينيسترلىگى وتكەن جازدا جەڭىس شىڭىندا قازا تاپقان رەسەيلىك الپينيست ناتاليا ناگوۆيتسينانىڭ دەنەسىن تاۋدان ءتۇسىرۋ مۇمكىندىگىن قاراستىرىپ جاتىر.
ۆەدومستۆو وكىلدەرىنىڭ مالىمەتىنشە، مينيسترلىك قاجەتتى كومەك كورسەتۋگە، سونىڭ ىشىندە ۇيلەستىرۋ جۇمىستارىن جۇرگىزۋگە جانە قاۋىپسىز جاعداي تۋىنداعان كەزدە قىرعىزستان قورعانىس مينيسترلىگىنىڭ اۆياتسياسىن تارتۋعا دايىن. جەڭىس شىڭىنان دەنەنى ەۆاكۋاتسيالاۋ ماسەلەسى تالقىلانىپ جاتىر. الايدا وپەراتسيانى وتكىزۋ تۋرالى رەسمي شەشىم ءالى قابىلدانباعان.
ناتاليا ناگوۆيتسينا 2025 جىلدىڭ تامىز ايىندا الپينيستەر توبىمەن بىرگە جەڭىس شىڭىنا كوتەرىلگەن. 12 تامىزدا ول 7200 مەتر بيىكتىكتە اياعىن سىندىرىپ الىپ، شاتىردا قالىپ قويعان. كەيىن توپ مۇشەلەرى وعان كومەكتەسۋگە تىرىسقانىمەن، تومەن ءتۇسىرۋ مۇمكىن بولماعان.
ءالپينيستتى قۇتقارۋ ءۇشىن بىرنەشە رەت وپەراتسيا ۇيىمداستىرىلىپ، تىكۇشاقتار دا قولدانىلعان. بىراق اۋا رايىنىڭ قولايسىزدىعىنا بايلانىستى بارلىق ارەكەت ناتيجە بەرمەدى.
23 تامىزدا بازالىق لاگەر باسشىسى دميتري گرەكوۆ قۇتقارۋ وپەراتسياسىنىڭ توقتاتىلعانىن مالىمدەگەن. ال قىركۇيەك ايىندا قىرعىزستان الپينيزم جانە قۇزعا ورمەلەۋ فەدەراتسياسى ناتاليا ناگوۆيتسينانىڭ قازا تاپقانىن رەسمي تۇردە راستادى.
