سيريا پرەزيدەنتى احمەد اش-شاراانىڭ اكەسى حۋسەين اش-شاراانىڭ دەير-ەز-زور پروۆينتسياسىنىڭ تۇرعىندارىنا قاتىستى ايتقان سوزدەرى قوعامدا ۇلكەن رەزونانس تۋدىرىپ، ايماقتا نارازىلىقتارعا سەبەپ بولدى، دەپ حابارلايدى «ادىرنا» ءتىلشىسى.
تەلەۆيزيالىق سۇحبات كەزىندە حۋسەين اش-شاراا دەير-ەز-زور تۇرعىندارىنا قاتىستى قورلاۋ سيپاتىنداعى سوزدەردى ايتقان. بەينەجازبا الەۋمەتتىك جەلىلەردە تاراعاننان كەيىن پروۆينتسيادا نارازىلىق اكتسيالارى ءوتتى.
جاعدايعا پرەزيدەنت احمەد اش-شاراا ارالاسىپ، دەير-ەز-زور گۋبەرناتورى زياد ءال-اياش ارقىلى ايماق وكىلدەرىمەن بايلانىس ورناتتى.
مەملەكەت باسشىسى اكەسىنىڭ ايتقان سوزدەرى ءۇشىن كەشىرىم سۇراپ، ەل بىرلىگىن ساقتاۋدىڭ ماڭىزىن اتاپ ءوتتى.
«اكەمنىڭ سوزدەرى دەير-ەز-زور تۇرعىندارىن رەنجىتپەي تۇرىپ، الدىمەن مەنىڭ كوڭىلىمە ءتيدى. سىزدەردىڭ قۇقىقتارىڭىز قورعالعان. دەير-ەز-زور حالقى — ءبىزدىڭ دوستارىمىز. اكەمنىڭ اتىنان كەشىرىم سۇرايمىن»، — دەدى پرەزيدەنت.
سيريانىڭ شىعىسىندا ورنالاسقان دەير-ەز-زور مۇناي قورىنا جانە گەوگرافيالىق ورنىنا بايلانىستى ەلدەگى ستراتەگيالىق ماڭىزدى ايماقتاردىڭ ءبىرى سانالادى. سيرياداعى قاقتىعىس جىلدارى بۇل پروۆينتسيا بىرنەشە رەت ءتۇرلى قارۋلى توپتار اراسىنداعى شايقاس الاڭىنا اينالعان.
سوڭعى ۋاقىتتا سيريا بيلىگى ورتالىق ۇكىمەت پەن جەرگىلىكتى حالىق اراسىنداعى بايلانىستى نىعايتۋ ماقساتىندا ايماقتىڭ رۋ باسشىلارىمەن جانە قوعام قايراتكەرلەرىمەن قارىم-قاتىناستى كۇشەيتكەن.
