مەملەكەت باسشىسى جاڭا كونستيتۋتسيا جوباسىنا قاتىستى رەفەرەندۋمدا داۋىس بەرگەننەن كەيىن جۋرناليستەرگە ارنالعان بريفينگ وتكىزدى. بۇل تۋرالى اقوردانىڭ ءباسپاسوز قىزمەتى جاريالادى، دەپ حابارلايدى “ادىرنا”.
بريفينگ بارىسىندا جۋرناليست «قازاقستان حالىقارالىق قاقتىعىستاردى ءاردايىم ديپلوماتيالىق جولمەن شەشۋدى جاقتايدى. ءسىز بۇل ۇستانىمدى جاقىندا تاياۋ شىعىستاعى احۋالعا قاتىستى مالىمدەمەلەرىڭىز ارقىلى راستادىڭىز. سونداي-اق شىعاناقتاعى بىرقاتار مەملەكەت باسشىسىمەن تەلەفون ارقىلى سويلەسىپ، ولارعا قولداۋ ءبىلدىردىڭىز. بىراق يران پرەزيدەنتىمەن سويلەسپەدىڭىز. بۇل قازاقستاننىڭ بەيتاراپ ۇستانىمىنان اينىپ، اراب ەلدەرىن قولدايتىنىن بىلدىرە مە؟» دەگەن ساۋال قويدى.
“قازاقستان الەمگە بەيبىت ەل رەتىندە بەلگىلى. كەز كەلگەن قاقتىعىستى ديپلوماتيالىق جولمەن شەشۋدى جاقتايمىز. بۇل –اينىماس ۇستانىمىمىز. تاياۋ شىعىستا ورىن العان جاعدايدىڭ ءتۇرلى سەبەبى بار. مەن مۇنى جاقىندا وتكەن القالى جيىندا دا ايتقانمىن. راسىندا، شىعاناقتاعى اراب ەلدەرىنىڭ باسشىلارىمەن تەلەفون ارقىلى سويلەستىم، تىلەكتەس ەكەنىمدى جەتكىزدىم. ال يران پرەزيدەنتى ماسۋد پەزەشكياننىڭ جاقىندا ەلىمىزگە رەسمي ساپارمەن كەلگەنىن بىلەسىزدەر. سول كەزدە جاقسى اسەر قالدىردى. ول — زايىرلى كوزقاراستاعى ادام، ءوزى كارديوحيرۋرگ. مەن ونىڭ يران شىعاناق ەلدەرىنە شابۋىل جاسامايدى دەگەن مالىمدەمەسىن قۇپتادىم.
ءتىپتى، ول يراننىڭ اتىنان كەشىرىم سۇرادى. الايدا كەيىن ونىڭ مالىمدەمەسى جوققا شىعارىلدى. يران اراب ەلدەرىنە شابۋىل جاساۋدى ءالى توقتاتقان جوق. بۇدان يران پرەزيدەنتىنىڭ بيلىككە تولىق يە ەمەس ەكەنى كورىنەدى. ول انىق. مەن ەشكىمدى ايىپتامايمىن، جاي عانا فاكتى رەتىندە ايتىپ وتىرمىن. بۇل يران بيلىگىنىڭ ەرەكشەلىگىنە بايلانىستى دەپ ويلايمىن. ءبىر جاعىنان ءدىني بيلىك ۇستەمدىك ەتەدى.
ويتكەنى يراندا ءدىني بيلىك نەگىزگى باعىت-باعداردى ايقىنداپ، شەشىم قابىلدايدى. پرەزيدەنت تە بار، بىراق ول — فورمالدى مەملەكەت باسشىسى، ءىس جۇزىندە ىقپالدى تۇلعا سانالمايدى. جالپى، كەز كەلگەن ەلدە، سونىڭ ىشىندە قازاقستاندا قوس بيلىك بولماۋعا ءتيىس. كەزىندە مۇنداي جۇيەنى ءبىز دە باستان وتكەردىك، بىراق بايانسىز بولدى. ءتورت جىل بۇرىن ەلىمىزدىڭ ىشكى تۇراقتىلىعىنا قاۋىپ ءتوندى. بۇل قازاقستانعا دا، باسقا مەملەكەتتەرگە دە ۇلكەن ساباق بولدى دەپ ويلايمىن. ءبىز يران حالقىنا، ونىڭ مادەنيەتى مەن تاريحىنا قۇرمەتپەن قارايمىز. سوندىقتان ءوز ۇستانىمىمىزدان اينىعان جوقپىز، ءاردايىم بەيبىتسۇيگىش ەل بولىپ قالا بەرەمىز”، - دەدى پرەزيدەنت.
