Memleket basşysy jaŋa Konstitusiia jobasyna qatysty referendumda dauys bergennen keiın jurnalisterge arnalǧan brifing ötkızdı. Būl turaly Aqordanyŋ baspasöz qyzmetı jariialady, dep habarlaidy “Adyrna”.
Brifing barysynda jurnalist «Qazaqstan halyqaralyq qaqtyǧystardy ärdaiym diplomatiialyq jolmen şeşudı jaqtaidy. Sız būl ūstanymdy jaqynda Taiau Şyǧystaǧy ahualǧa qatysty mälımdemelerıŋız arqyly rastadyŋyz. Sondai-aq Şyǧanaqtaǧy bırqatar memleket basşysymen telefon arqyly söilesıp, olarǧa qoldau bıldırdıŋız. Bıraq İran Prezidentımen söilespedıŋız. Būl Qazaqstannyŋ beitarap ūstanymynan ainyp, arab elderın qoldaitynyn bıldıre me?» degen saual qoidy.
“Qazaqstan älemge beibıt el retınde belgılı. Kez kelgen qaqtyǧysty diplomatiialyq jolmen şeşudı jaqtaimyz. Būl –ainymas ūstanymymyz. Taiau Şyǧysta oryn alǧan jaǧdaidyŋ türlı sebebı bar. Men mūny jaqynda ötken alqaly jiynda da aitqanmyn. Rasynda, Şyǧanaqtaǧy arab elderınıŋ basşylarymen telefon arqyly söilestım, tılektes ekenımdı jetkızdım. Al İran Prezidentı Masud Pezeşkiannyŋ jaqynda elımızge resmi saparmen kelgenın bılesızder. Sol kezde jaqsy äser qaldyrdy. Ol — zaiyrly közqarastaǧy adam, özı kardiohirurg. Men onyŋ İran Şyǧanaq elderıne şabuyl jasamaidy degen mälımdemesın qūptadym.
Tıptı, ol İrannyŋ atynan keşırım sūrady. Alaida keiın onyŋ mälımdemesı joqqa şyǧaryldy. İran arab elderıne şabuyl jasaudy älı toqtatqan joq. Būdan İran Prezidentınıŋ bilıkke tolyq ie emes ekenı körınedı. Ol anyq. Men eşkımdı aiyptamaimyn, jai ǧana faktı retınde aityp otyrmyn. Būl İran bilıgınıŋ erekşelıgıne bailanysty dep oilaimyn. Bır jaǧynan dıni bilık üstemdık etedı.
Öitkenı İranda dıni bilık negızgı baǧyt-baǧdardy aiqyndap, şeşım qabyldaidy. Prezident te bar, bıraq ol — formaldy memleket basşysy, ıs jüzınde yqpaldy tūlǧa sanalmaidy. Jalpy, kez kelgen elde, sonyŋ ışınde Qazaqstanda qos bilık bolmauǧa tiıs. Kezınde mūndai jüienı bız de bastan ötkerdık, bıraq baiansyz boldy. Tört jyl būryn elımızdıŋ ışkı tūraqtylyǧyna qauıp töndı. Būl Qazaqstanǧa da, basqa memleketterge de ülken sabaq boldy dep oilaimyn. Bız İran halqyna, onyŋ mädenietı men tarihyna qūrmetpen qaraimyz. Sondyqtan öz ūstanymymyzdan ainyǧan joqpyz, ärdaiym beibıtsüigış el bolyp qala beremız”, - dedı Prezident.
