رەسەيدىڭ مەملەكەتتىك دۋماسى ەلدىڭ قارۋلى كۇشتەرى مەن باسقا دا اسكەري قۇرىلىمدارىندا كەلىسىمشارت نەگىزىندە قىزمەت اتقارىپ جاتقان شەتەل ازاماتتارىن دەپورتاتسيالاۋعا تىيىم سالاتىن زاڭ جوباسى ءبىراۋىزدان قابىلداندى، دەپ حابارلايدى «ادىرنا» ءتىلشىسى.
قۇجات مۇنداي ازاماتتارعا قاتىستى دەپورتاتسيا، رەادميسسيا (قايتا قابىلداۋ), ۋاقىتشا بولۋ مەرزىمىن قىسقارتۋ، ۋاقىتشا تۇرۋعا رۇقساتتى، تۇرۋعا ىقتيارحاتتى، پاتەنتتى نەمەسە جۇمىس ىستەۋگە رۇقساتتى بەرۋدەن باس تارتۋ، سونداي-اق ولاردى جويۋ نەمەسە كۇشىن جويۋ تۋرالى شەشىم قابىلداۋعا تىيىم سالۋدى كوزدەيدى. بۇدان بولەك، بۇعان دەيىن قابىلدانعان وسىنداي شەشىمدەردىڭ كۇشى جويىلىپ، ولار ورىندالۋعا جاتپايدى.
«بۇل ادامدار ىسىمەن رەسەيگە دەگەن ادالدىعىن كورسەتتى. سوندىقتان مەملەكەت ولاردىڭ تۇراقتى ءارى ءادىل جاعدايدا قىزمەت ەتۋىنە جاعداي جاساپ، رەسەي فەدەراتسياسىنىڭ قورعانىس قابىلەتىن نىعايتۋعا ۇلەس قوسۋىنا مۇمكىندىك بەرۋدى جالعاستىرادى»،– دەپ اتاپ ءوتتى مەملەكەتتىك دۋمانىڭ تامبوۆ وبلىسىنان سايلانعان دەپۋتاتى تامارا فرولوۆا.
دۋما سونداي-اق رەسەيدەن كەتكەن ازاماتتاردىڭ مۇلكىن قاماۋعا الۋعا رۇقسات بەردى. 26 مامىردا رەسەي پارلامەنتى ەلدەن كەتكەن ازاماتتاردىڭ اكىمشىلىك قۇقىقبۇزۋشىلىقتار بويىنشا ايىپپۇلدارىن وتەۋدى قامتاماسىز ەتۋ ماقساتىندا ولاردىڭ مۇلكىن سوت ارقىلى تاركىلەۋگە (قاماۋعا الۋعا) مۇمكىندىك بەرەتىن زاڭ جوباسىن ءبىراۋىزدان قولدادى. بۇل ساناتقا، اتاپ ايتقاندا، «شەتەل اگەنتى» قىزمەتىن ورىنداۋ ءتارتىبىن بۇزۋ، ەكسترەميستىك ماتەريالداردى دايىنداۋ جانە تاراتۋ، جالعان اقپارات تاراتۋ جانە باق ەركىندىگىن تەرىس پايدالانۋ، سونداي-اق «جاعىمسىز ۇيىمداردىڭ» قىزمەتىنە قاتىسۋ جاتادى.
13 مامىردا مەملەكەتتىك دۋما پۋتينگە رەسەي ازاماتتارىن شەتەلدە قاماۋعا الۋ، ۇستاۋ نەمەسە قىلمىستىق قۋدالاۋ جاعدايىندا ولاردى قورعاۋ ماقساتىندا باسقا ەلدەرگە اسكەر ەنگىزۋگە رۇقسات بەرەتىن زاڭدى ماقۇلداعان. اتاپ ايتقاندا، بۇل رەسەي قاتىسپايتىن سوتتار نەمەسە ماسكەۋ مويىندامايتىن حالىقارالىق ينستانتسيالار تاراپىنان بولعان جاعدايلارعا قاتىستى. بۇعان دەيىن پرەزيدەنت تەك رەسەيدىڭ مۇددەلەرىنە نەمەسە قوعامدىق قۇقىق ءتارتىبىنىڭ نەگىزدەرىنە قايشى شەشىمدەرگە جاۋاپ رەتىندە عانا اسكەر جىبەرە الاتىن.
