كازتالوۆ اۋدانىندا سوڭعى ءۇش جىلدا ءبىلىم سالاسىنا ەرەكشە كوڭىل ءبولىنىپ، بۇل باعىتتاعى جۇيەلى جۇمىستار ناقتى ناتيجەسىن بەرە باستادى. مەملەكەتتىك باعدارلامالار اياسىندا جۇزەگە اسقان جوبالارمەن قاتار، اۋدان اكىمدىگىنىڭ قولداۋىمەن قولعا الىنعان باستامالار دا دارىندى جاستاردىڭ تالابىن ۇشتاپ، ءبىلىم ساپاسىنىڭ ارتۋىنا وڭ ىقپال ەتۋدە.
سونىڭ جارقىن كورىنىستەرىنىڭ ءبىرى — رەسپۋبليكالىق جانە حالىقارالىق وليمپيادالار مەن عىلىمي جوبالاردا توپ جارعان وقۋشىلاردى، ولاردىڭ جەتەكشىلەرىن ۇلىقتاۋعا ارنالعان سالتاناتتى ماراپاتتاۋ شاراسى. اۋدان كولەمىندە دارىندى وقۋشىلاردى قولداۋ داستۇرگە اينالىپ كەلەدى. ءبىلىم دودالارىندا ۇزدىك ناتيجە كورسەتكەن شاكىرتتەر مەن ولاردىڭ ۇستازدارىنا قۇرمەت كورسەتۋ جاس بۋىننىڭ عىلىم مەن بىلىمگە دەگەن قىزىعۋشىلىعىن ارتتىرىپ، جاڭا جەتىستىكتەرگە جەتەلەۋدىڭ ءتيىمدى تەتىگى.
قاراوزەن مەكتەپ-ليتسەيىندە ءداستۇرلى «دارىندىلىققا دارا جول» اتتى رەسپۋبليكالىق وليمپيادا، عىلىمي جوبا جانە شىعارماشىلىق بايقاۋلار جەڭىمپازدارىن ماراپاتتاۋعا ارنالعان سالتاناتتى كەش ءوتتى.
تاعىلىمدى شاراعا اۋدان اكىمى اسلانبەك سارقۇلوۆ، «AMANAT» پارتياسى باتىس قازاقستان وبلىستىق فيليالىنىڭ اتقارۋشى حاتشىسى ازامات سافيماليەۆ، وبلىستىق ءبىلىم باسقارماسى باسشىسىنىڭ ورىنباسارى اقجارقىن تەمىرحانوۆا، مەكتەپ ديرەكتورلارى، ۇستازدار، وقۋشىلار قاتىستى.
ءبىلىم مەن عىلىم بايگەسىندە اۋدان ابىرويىن اسقاقتاتىپ جۇرگەن دارىندى جاستاردى ۇلىقتاۋعا ارنالعان كەشتە رەسپۋبليكالىق دەڭگەيدە توپ جارعان وقۋشىلار مەن ولاردىڭ جەتەكشىلەرى ماراپاتتالدى.
سالتاناتتى جيىندا اۋدان اكىمى اسلانبەك احمەتوللاۇلى ءبىلىمدى ۇرپاق — ەل بولاشاعىنىڭ كەپىلى ەكەنىن اتاپ ءوتتى. ول رەسپۋبليكالىق وليمپيادالار مەن بايقاۋلاردا جەڭىس تۇعىرىنان كورىنىپ جۇرگەن شاكىرتتەردىڭ جەتىستىگى ۇستاز ەڭبەگى مەن اتا-انا قولداۋىنىڭ جەمىسى ەكەنىن جەتكىزدى.
— بۇگىنگى باسقوسۋدىڭ باستى سەبەبى جاس دارىندارىمىز. سىزدەر تەك شاعىن مەكتەپ قانا ەمەس، اتسداننىڭ مەرەيىن اسقاقتاتتىڭىزدار. ءبىلىم سالاسىندا ۇشتىك وداقتىڭ ناقتى كورسەتكىشى وزدەرىڭىزسىزدەر. پرەزيدەنت باتاماسىمەن اۋدانىمىزدا بىرقاتار جۇمىستار اتقارىلۋدا. سوڭعى ءۇش جىلدى 4 مەكتەپ پايدالانۋعا بەرىلدى، 2 مەكتەپ كۇردەلى جوندەۋدەن ءوتىپ، ماتەريالدىق تەحنيكالىق بازا نىعايتىلدى. سونىمەن قاتار وقۋشىلارىمىز وبلىستىق، رەسپۋبليكالىق جانە حالىقارالىق بايقاۋلار مەن پاندىك وليمپيادالاردا اۋدان مەرەيىن اسقاقتاتىپ كەلەدى، — دەدى اۋدان اكىمى.
كەش بارىسىندا جالپى ءبىلىم بەرەتىن پاندەر بويىنشا رەسپۋبليكالىق وليمپيادا مەن اۋىل مەكتەپتەرى وقۋشىلارى اراسىنداعى رەسپۋبليكالىق وليمپيادالاردىڭ جەڭىمپازدارى ماراپاتتالدى. اتاپ ايتقاندا، عينيات مولداشەۆ اتىنداعى جالپى ورتا ءبىلىم بەرەتىن مەكتەبىنىڭ 11 سىنىپ وقۋشىسى ماتحات راشيدوۆ قازاق ءتىلى مەن ادەبيەتى پانىنەن رەسپۋبليكالىق وليمپيادالاردا ءىىى ورىن يەلەنىپ، اۋدان مەرەيىن ۇستەم ەتتى. جەتەكشىسى —ايناگۇل قاراساەۆا. وسى مەكتەپتىڭ تاعى ءبىر وقۋشىسى ءاسانالى مۇرادىموۆ ماتەماتيكا پانىنەن اۋىل مەكتەپتەرى وقۋشىلارىنا ارنالعان رەسپۋبليكالىق وليمپيادادا ءىى ورىن الدى. جەتەكشىسى — نۇربەك وتەبالى.
قاراوزەن مەكتەپ-ليتسەيىنىڭ 10 سىنىپ وقۋشىسى اياۋلىم تىلەپبەرگەن قازاق ءتىلى مەن ادەبيەتى پانىنەن رەسپۋبليكالىق وليمپيادادا ءىى ورىن يەلەنسە، جەتەكشىسى —البينا تاسقاليەۆا. الما ورازباەۆا اتىنداعى جالپى ورتا ءبىلىم بەرەتىن مەكتەبىنىڭ 11 سىنىپ وقۋشىسى تالاپوۆا دانا سەرىكقىزى رەسپۋبليكالىق وليمپيادادا قازاق ءتىلى مەن ادەبيەتى پانىنەن ءى ورىن جەڭىپ الىپ، اۋدان نامىسىن ابىرويمەن قورعادى. جەتەكشىسى — بوتاگوز سارمالاەۆا.
سونىمەن قاتار رەسپۋبليكالىق شىعارماشىلىق جانە زياتكەرلىك بايقاۋلاردا توپ جارعان وقۋشىلار دا ارنايى ماراپاتتالدى. كەنجەبەك مەنداليەۆ اتىنداعى جالپى ورتا ءبىلىم بەرەتىن مەكتەبىنىڭ 11 سىنىپ وقۋشىسى ماقسات حامزين «التىن تۇلەك» ماتەماتيكالىق وليمپياداسىنىڭ رەسپۋبليكالىق كەزەڭىندە ءىىى ورىن السا، قاراوزەن مەكتەپ-ليتسەيىنىڭ 11 سىنىپ وقۋشىسى ايات شوقات وسى وليمپيادادان ءىىى ورىن يەگەرى اتاندى. بىرىك جالپى ورتا ءبىلىم بەرەتىن مەكتەبىنىڭ 11 سىنىپ وقۋشىسى ايزادا جولدىباي، عۇمار قاراش اتىنداعى مەكتەپ-گيمنازياسىنىڭ 11 سىنىپ وقۋشىسى قاراقات نۇربولات، كازتالوۆ مەكتەپ-ليتسەيىنىڭ 11 سىنىپ وقۋشىسى جۇماگەلدى اياۋلىم جادىگەرقىزى دا رەسپۋبليكالىق ماتەماتيكالىق وليمپيادادا جۇلدەلى ورىندار يەلەندى.
سۇلەيمەن ەسەتوۆ اتىنداعى مەكتەپ-بوبەكجاي كەشەنىنىڭ 8 سىنىپ وقۋشىسى اقجۇرەك تەمىرحانوۆ «تابيعاتتى ايالا» رەسپۋبليكالىق فورۋمىندا ءىى ورىن السا، كەنجەبەك مەنداليەۆ اتىنداعى جالپى ورتا ءبىلىم بەرەتىن مەكتەبىنىڭ 11 سىنىپ وقۋشىسى نارگيزا ەلەۋسىنوۆا رەسپۋبليكالىق «اقبەرەن» بايقاۋىندا ءىى ورىنعا يە بولدى. اقپاتەر جالپى ورتا ءبىلىم بەرەتىن مەكتەبىنىڭ 10 سىنىپ وقۋشىسى تالعاتقىزى ايساۋلە XXVI رەسپۋبليكالىق «اباي وقۋلارى» بايقاۋىندا ءىى ورىن يەلەنىپ، ونەرىمەن كوپشىلىكتى ءتانتى ەتتى.
عينيات مولداشەۆ اتىنداعى جالپى ورتا ءبىلىم بەرەتىن مەكتەبىنىڭ 8 سىنىپ وقۋشىسى دۋمانقىزى ءامينا رەسپۋبليكالىق ء«ابىش وقۋلارىندا» ءىى ورىن يەلەنسە، الما ورازباەۆا اتىنداعى جالپى ورتا ءبىلىم بەرەتىن مەكتەبىنىڭ 11 سىنىپ وقۋشىسى نۇرداۋلەت عازيزجان «اقبەرەن» بايقاۋىنان ءىىى ورىن جانە رەسپۋبليكالىق ء«ابىش وقۋلارىنان» ءى ورىن جەڭىپ الدى.
سونداي-اق رەسپۋبليكالىق عىلىمي جوبالار كونكۋرسىندا ۇزدىك تانىلعان جاس زەرتتەۋشىلەر دە ماراپات تورىنەن كورىندى. سۇلەيمەن ەسەتوۆ اتىنداعى مەكتەپ-بوبەكجاي كەشەنىنىڭ 5 سىنىپ وقۋشىسى ايلانا نۇرلانقىزى، كازتالوۆ مەكتەپ-ليتسەيىنىڭ وقۋشىلارى مۇحامەدالي ماقساتۇلى، ەڭلىك امانجولقىزى، ءميرالى ميرلانۇلى، شىنتەمىر مۇحتارۇلى جانە بوستاندىق جالپى ورتا ءبىلىم بەرەتىن مەكتەبىنىڭ 7 سىنىپ وقۋشىسى سايات جايىقۇلى رەسپۋبليكالىق «زەردە» عىلىمي جوبالار بايقاۋىندا جوعارى ناتيجەلەرگە قول جەتكىزدى.
جيىندا جۇلدەگەر وقۋشىلارعا نوۋتبۋك، اقشالاي سەرتيفيكاتتار تابىستالىپ، جەتەكشى ۇستازدارعا قارجىلاي سىياقى بەرىلدى. سونىمەن قاتار، قاراوزەن مەكتەپ-ليتسەيىنىڭ العاشقى ديرەكتورلارىنىڭ ءبىرى بولعان ۇلاعاتتى ۇستاز مۇتيعوللا تەميرحانوۆتىڭ ۇرپاقتارى ليتسەي وقۋشىلارى اياۋلىم تىلەپبەرگەن مەن مارعۇلان ۋتەگەنوۆكە ارنايى شاكىرتاقى تابىستادى.
سالتاناتتى شارادا ءسوز العان «AMANAT» پارتياسى باتىس قازاقستان وبلىستىق فيليالىنىڭ اتقارۋشى حاتشىسى ازامات سافيماليەۆ، وبلىستىق ءبىلىم باسقارماسى باسشىسىنىڭ ورىنباسارى اقجارقىن تەمىرحانوۆا وقۋشىلاردى جەتىستىكتەرىمەن قۇتتىقتاپ، جىلى لەبىزىن ءبىلدىرىپ، پارتيالىق جانە باسقارما باسشىسىنىڭ العىس حاتتارىن تابىس ەتتى.
ايتا كەتەيىك رەسپۋبليكالىق پاندىك وليمپيادانىڭ ءى ورىن يەگەرىنىڭ جەتەكشىسىنە 1 ملن تەڭگە، ءىى ورىنعا 700 مىڭ تەڭگە، 3 ورىنعا 500 مىڭ تەڭگە كولەمىندە قارجىلاي سىياقى بەرىلدى. ال رەسپۋبليكالىق شىعارماشىلىق جانە زياتكەرلىك بايقاۋلار مەن عىلىمي جوبالار كونكۋرسىندا ۇزدىك تانىلعان وقۋشىلار مەن جەتەكشىلەرى دە قارجىلاي سىيلىققا يە بولدى. سونىمەن قاتار اۋىلدا مال ۇستايتىن ۇستازدارعا 1 تىركەمە ءشوپ بەرىلمەك. وقۋشىلاردىڭ تالابىن شىڭداپ، قارجىلاي قولداۋ كورسەتكەن اۋدان اكىمى، اۋداندىق ءماسليحات دەپۋتاتتارى، اۋدانىمىزدىڭ كاسىپكەرلەرى جانە ورال قالاسىنداعى جەرلەسىمىز «باتىس بيزنەس» جشس ديرەكتورى ايان سەرىكۇلى مولداعاليەۆ ەكەنىن اتاپ وتكەن ءجون.
ازامات سافيماليەۆ، «AMANAT» پارتياسى باتىس قازاقستان وبلىستىق فيليالىنىڭ اتقارۋشى حاتشىسى:
— جالپى ءسىزدىڭ اۋداندا بالالاردىڭ قانداي جەتىستىككە جەتىپ جاتىرعانىن، ءبىزدىڭ بالالارىمىزدىڭ وقۋ كەزەڭىندە تەك قانا اۋداندىق، وبلىستىق عانا ەمەس، رەسپۋبليكالىق دەڭگەيدە ۇلكەن جەتىستىككە جەتىپ جاتىرعانىنان حاباردارمىز. ەڭ بىرىنشىدەن بۇل اتا-انانىڭ تاربيەسى، ودان كەيىن ۇستازداردىڭ تىنىمسىز ەڭبەگى. وسى ۇستازداردىڭ ارقاسىندا بۇگىن ءبىز جارقىراعان بولاشاعىمىز، ءبۇلدىرشىن بالالارىمىزدى ماراپاتتاپ، ۇلكەن شارادا كەزدەسىپ جاتىرمىز. قازىرگى ۋاقىتتا ەلىمىزدە پرەزيدەنت تاپسىرماسىمەن، ۇكىمەتتىڭ باقىلاۋىمەن ۇلكەن ىستەر اتقارىلىپ جاتىر. بۇنىڭ بارلىعى بالالارىمىزدىڭ بولاشاعى جارقىن بولسىن دەگەن نيەتتە جۇزەگە اسىپ جاتىر.
اقجارقىن تەمىرحانوۆا، بقو ءبىلىم باسقارماسى باسشىسىنىڭ ورىنباسارى:
—مەن ءۇشىن بۇل تولعاندىراتىن ءسات. وسى مەكتەپتە ءبىرىنشى سىنىپتان باستاپ، ءبىلىم الىپ، تاربيە الىپ، ۇلكەن ومىرگە اتتاندىق. بەلگىلى ءبىر دارەجەدە التىن ۇيا مەكتەبىمە قايتا ورالىپ، ماڭىزدى شارانىڭ كۋاسى بولىپ وتىرعانىما قۋانىشتىمىن. زالدا وتىرعان وقۋشىلارىمىز ءسۇتتىڭ بەتىندەگى قايماقتارى، ياعني، اۋداننىڭ ءبىلىم سالاسىندا جەتىستىككە جەتىپ جۇرگەن وقۋشىلارىمىز ەكەن. جەتىستىكتەرىڭىز قۇتتى بولسىن! بۇل جەتىستىكتەر الداعى ۋاقىتتا دا سىزدەردىڭ ومىرىڭىزدە تابىستى بولۋىڭىزعا سەپتىگىن تيگىزەدى. كازتالوۆ اۋدانى ءبىلىم بەرۋ سالاسى بويىنشا وڭىردە الدىڭعى قاتارلى ورىندا. اۋدان اكىمى اسلانبەك احمەتوللاۇلىنىڭ ءبىلىمدى بالالاردى قولداۋ باعىتىنداعى باستاماسى وتە ورىندى. وزگە اۋداندارعا ۇلگى بولارلىق.
اسەمجان تاسقاليەۆا، قاراوزەن مەكتەپ-ليتسەيىنىڭ ماتەماتيكا ءپانىنىڭ مۇعالىمى، پەداگوگ-مودەراتور:
— بۇگىنگى تاباندى ەڭبەك، ماڭداي تەر، ءۇمىت پەن سەنىم، جەڭىس پەن قوشەمەتتىڭ مەرەكەسى قۇتتى بولسىن! ءبىلىم الەمىندەگى ءاربىر جىل، ءاربىر جاڭا بەلەس. بيىل دا شاكىرتتەرىمىز رەسپۋبليكالىق دودالاردا جۇلدەلى ورىن الىپ، ءبىزدىڭ بەرگەن ءبىلىمىمىزدىڭ باسەكەگە قابىلەتتى ەكەنىن تاعى ءبىر دالەلدەدى.وسىدان ءۇش جىل بۇرىن شاكىرتىم زەينوللاقىزى اقجان رەسپۋبليكالىق وليمپيادادا ءبىرىنشى ورىن الىپ، اۋدانىمىزدا العاشىلاردىڭ ءبىرى بولىپ 500 مىڭ تەڭگەلىك سەرتيفيكاتپەن ماراپاتتالعان بولاتىنمىن. بۇگىن اياۋلىم شاكىرتىمنىڭ جەڭىسىمەن، تاعى دا وسىنداي كەشتە جۇزدەسۋ جازىلعان ەكەن. بارشا كورسەتكەن قۇرمەت، قوشەمەتتەرىڭىز ءۇشىن العىسىمىز شەكسىز. بۇنىڭ بارلىعى ۇستاز بەن شاكىرتكە ارتىلعان سەنىم، جاساعان ەڭبەكتەرى ءۇشىن جاسالعان قوشەمەت پەن قولداپ دەپ تۇسىنەمىن. ءبىلىم الەمىندە ءار مەكتەپتىڭ، ءار ولكەنىڭ تاريحىنا وزدەرىنىڭ ەسىمدەرىن التىن ارىپپەن جازىپ جاتىرعان قۇرمەتتى ءبىلىم الەمىنىڭ جاناشىرلارى: «ادامدىق بورىشىڭ، حالقىڭا ەڭبەك قىل»، - دەپ ۇرانداتقان شاكارىم بابامىزدىڭ سوزىمەن ءوز ءسوزىمدى قورىتىندىلاعىم كەلەدى.
قايتادان قايىرىلىپ قاۋىمعا كەلمەيسىڭ،
بارىڭدى، ءنارىڭدى تىرلىكتە بەرگەيسىڭ.
عيبرات الار ارتىڭا ءىز قالدىرساڭ،
شىن باقىت - وسىنى ۇق ماڭگى ولمەيسىڭ.
گۇلايىم وتەگەنوۆا، كازتالوۆ مەكتەپ-ليتسەيىنىڭ باستاۋىش سىنىپ مۇعالىمى، پەداگوگ-زەرتتەۋشى:
— ەرەكشە كەزدەسۋدىڭ ءبىرى جانە جۇرەگىمدى تەربەتكەن، ماماندىعىما دەگەن ماحابباتتى ودان سايىن ارتتىرعان ءسات دەپ بىلەمىن. وسى ءساتتى قولدانا وتىرىپ، وسى شارانى ۇيىمداستىرۋعا مۇرىندىق بولعان اۋداندىق ءبىلىم بەرۋ بولىمىنە، قولداعان اۋدان اكىمدىگىنە، وبلىستىق ءبىلىم باسقارماسىنا، «AMANAT» پارتياسى بقوف-نا ۇستازدارعا كورسەتكەن قۇرمەتتەرىڭىز ءۇشىن شىنايى ارعىسىمدى بىلدىرەمىن! سىزدەردىڭ قۇرمەتتەرىڭىز وسى جەردە وتىرعان ۇستازدارعا عانا كورسەتىلگەن باعا ەمەس، جالپى شاكىرتتەرگە ءبىلىم مەن تاربيە بەرىپ جۇرگەن ۇستازدارعا دەگەن باعا دەپ بىلەمىن جانە وقۋشىلاردىڭ ودان ءارى قاناتتانۋىنا سەرپىلىس بولدى دەپ تۇسىنەمىن. ۇستاز ءۇشىن ەڭ بيىك جەتىستىك، ول وقۋشىسىنىڭ بيىك بەلەستى باعىندىرۋى. وسى ورايدا مەنىڭ كىشكەنتاي عانا وقۋشىم مۇحامەدالي رەسپۋبليكالىق «زەردە» عىلىمي جوبالار بايقاۋىنان جۇلدەلى ءىىى ورىن الىپ، مەنىڭ ۇستازدىق باقىتىمدى ەسەلەگەن بولاتىن. تاعى ءبىر مارتە وقۋشىمدى قۇتتىقتاعىم كەلەدى. بۇل وقۋشىلاردىڭ جەڭىمپاز اتانۋى، تەك وقۋشىنىڭ تالپىنىسى عانا ەمەس، جاپى اتا-انالاردىڭ جان-جاقتى قولداۋى، ۇجىمنىڭ بىرلەسكەن ەڭبەگىنىڭ ناتيجەسى دەپ بىلەمىن. الداعى ۋاقىتتا دا وسى شاكىرتتەردىڭ تالپىنىسىن شىڭداپ، دارىندىلىعىن دارا ەتۋگە بارشا ۇستازدىق ەبەگىمدى ايامايمىن دەپ سەنىم بىلدىرەمىن. ەڭ باستىسى ەلىمىز تىنىش، بالالارىمىزدىڭ بولاشاعى جارقىن بولسىن!
البينا تاسقاليەۆا، قاراوزەن مەكتەپ-ليتسەيىنىڭ قازاق ءتىلى مەن ادەبيەتى ءپانىنىڭ مۇعالىمى، پەداگوگ-زەرتتەۋشى:
— ۇستاز ەڭبەگى – بولاشاققا سالىنعان ينۆەستيتسيا دەپ ويلايمىن. مەن ءۇشىن بيىلعى جىل ەرەكشە بولدى. «قالادان-اۋىلعا» باعدارلاماسى بويىنشا وتباسىممەن قاراوزەن اۋىلىنا كوشىپ كەلدىم. اۋىل تۇرعىندارى، مەكتەپ ۇجىمى ءبىزدى جىلى قارسى الدى. وسىنىڭ ارقاسىندا ءبىز جۇمىسىمىزدى سەنىممەن اتقارىپ، وقۋشىلارىمىزدى جەڭىسكە جەتەلەدىك. وقۋشىلارىمىز اۋداندىق، وبلىستىق، رەسپۋبليكالىق وليمپيادالاردا جۇلدەلى ورىندار الدى. وسىنداي اۋىلدىڭ دامۋىنا كىشكەنە بولسا دا ءوز ۇلەسىمىزدى قوسقانىمىز ءبىز ءۇشىن ۇلكەن ماقتانىش. وسى باعدارلاماعا اتسالىسىپ، دامۋىنا قولداۋ بىلدىرگەن باتىس قازاقستان وبلىسىنىڭ اكىمى ناريمان تورەعاليۇلىنا، كازتالوۆ اۋدانىنىڭ اكىمى اسلانبەك احمەتوللاۇلىنا، اۋداندىق ءبىلىم بەرۋ ءبولىمىنىڭ باسشىسى سامال قاناپياقىزىنا، قاراوزەن اۋىلدىق وكرۋگىنىڭ اكىمى نۇرحات ساتىبالدىۇلىنا، قاراوزەن مەكتەپ-ليتسەيىنىڭ ديرەكتورى ءۋاليحان ەرعاليۇلىنا العىسىمدى ايتامىن. بارشاڭىزدىڭ وتباسىلارىڭىزعا اماندىق، ەڭبەكتەرىڭىزگە جەمىس تىلەيمىن!
دانا تالاپوۆا، الما ورازباەۆا اتىنداعى جالپى ورتا ءبىلىم بەرەتىن مەكتەبىنىڭ 2026 جىلعى تۇلەگى:
— بۇگىن مەن ءۇشىن ەرەكشە ءارى قۋانىشتى كۇن بولدى. اۋدان باسشىلىعىنىڭ باستاماسىمەن ۇيىمداستىرىلعان بۇل تاعىلىمدى شاراعا وبلىستىق ءبىلىم باسقارماسى باسشىسىنىڭ ورىنباسارى، «AMANAT» پارتياسى باتىس قازاقستان وبلىستىق فيليالىنىڭ اتقارۋشى حاتشىسى جانە اۋدان اكىمى قاتىسىپ، دارىندى جاستارعا قۇرمەت كورسەتۋى بىزگە ۇلكەن سەرپىن سىيلادى. مۇنداي قولداۋ بىلىمگە ۇمتىلعان جاس ۇرپاققا كورسەتىلگەن زور سەنىم دەپ بىلەمىن. بۇل مەنىڭ ەڭبەگىمە بەرىلگەن جوعارى باعا ءارى ۇلكەن جاۋاپكەرشىلىك. الداعى ۋاقىتتا دا اۋدانىمىزدىڭ ابىرويىن اسقاقتاتۋعا بار كۇش-جىگەرىمدى سالامىن.
اسىلبەك ناسىپقاليۇلى
