قازاقستانداعى QAZBILIM ءبىلىم بەرۋ جوباسىنىڭ ۇلتتىق ليتسەيلەر باعىتى ءوز جۇمىسىن رەسمي تۇردە توقتاتتى، دەپ حابارلايدى "ادىرنا" ۇلتتىق پورتالى.
جوبا جەتەكشىسى اياتجان احمەتجاننىڭ ايتۋىنشا، ليتسەيلەردىڭ جابىلۋىنا سوڭعى بىرنەشە جىلداعى قارجىلىق قيىندىقتار سەبەپ بولعان. ۇلتتىق ليتسەيلەر باعىتى ءتورت جىلعا جۋىق ۋاقىت جۇمىس ىستەپ، كوپتەگەن وقۋشىعا ءبىلىم بەرگەن.
«2023 جىلدىڭ ناۋرىزىنان باستالعان ءارتۇرلى قىسىمدار مەن قارجىلىق قىسپاقتىڭ سالدارىنان بۇل باعىتتىڭ جۇمىسىن رەسمي تۇردە توقتاتتىم. بۇل – مەن ءۇشىن وتە اۋىر شەشىم»، – دەدى ول.
جوبا جەتەكشىسى بۇدان بىلاي كۇش-جىگەرىن QAZBILIM ورتالىعى مەن QAZBILIM كىتاپتارى باعىتتارىن دامىتۋعا جۇمسايتىنىن ايتتى. ونىڭ باستى ماقساتى – جينالعان قارىزداردى وتەۋ جانە ءوز مىندەتتەمەلەرىن ورىنداۋ.
سونىمەن قاتار، ول QAZBILIM اياسىندا ساپالى ءبىلىم بەرۋ مەن كىتاپ شىعارۋ ءىسى جالعاساتىنىن اتاپ ءوتتى.
ء«بىز جۇيەمىزدى ساقتايمىز. سوندىقتان ساپالى ءبىلىم بەرۋ قىزمەتىمىزدى دە، ساپالى كىتاپتار شىعارۋدى دا توقتاتپايمىز»، – دەدى اياتجان احمەتجان.
جوبا جەتەكشىسى قولداۋ كورسەتكەن ازاماتتارعا العىس ءبىلدىرىپ، قانداي دا ءبىر زيانى تيگەن ادامداردان كەشىرىم سۇرادى. ول الداعى ۋاقىتتا جوبانىڭ وزگە باعىتتارى جۇمىسىن جالعاستىراتىنىنا سەنىم ءبىلدىردى.
