مەملەكەت باسشىسى قاسىم-جومارت توقاەۆ حالىقارالىق بالالاردى قورعاۋ كۇنىمەن قۇتتىقتادى، دەپ حابارلايدى «ادىرنا» ءتىلشىسى.
«حالىقارالىق بالالاردى قورعاۋ كۇنى قۇتتى بولسىن! جاس ۇرپاقتىڭ قۇقىعىن قورعاۋ، دەنساۋلىعىن ساقتاۋ جانە ولاردىڭ جان-جاقتى دامۋىنا قولايلى جاعداي جاساۋ – جالپىۇلتتىق ماقسات جانە كونستيتۋتسيالىق مىندەت. اۋىزبىرشىلىگى مىقتى، تاتۋ-ءتاتتى وتباسى – باقىتتى بالالىق شاقتىڭ ارقاۋى. سوندىقتان وتباسى قۇندىلىقتارىن قورعاۋ جاڭا كونستيتۋتسيانىڭ اسا ماڭىزدى نورماسىنىڭ ءبىرى رەتىندە ايقىندالدى. وسكەلەڭ ۇرپاقتىڭ جاسامپازدىق رۋحى وراسان زور. ولار ءبىلىم مەن سپورتتا، ونەردە مول تابىسقا جەتۋدە. مەنىڭ باستاماممەن قولعا الىنعان «ۇلتتىق قور – بالالارعا» جوباسى اياسىندا مەملەكەت تاراپىنان ءاربىر بالاعا قامقورلىق جاسالىپ جاتىر. بيىل «قازاقستان بالالارى» تۇجىرىمداماسى ىسكە اسىرىلا باستادى. جاس بۋىندى قولداۋ ءاردايىم ەلىمىزدىڭ، ياعني ادىلەتتى جانە وزىق قازاقستاننىڭ باستى نازارىندا بولادى»،– دەپ جازدى پرەزيدەنت Instagram پاراقشاسىندا.
ايتا كەتەيىك، بالالاردى قورعاۋ كۇنىنىڭ ماقساتى – بالالاردىڭ ءومىر سۇرۋگە، پىكىر بوستاندىعىنا، ءبىلىم الۋعا جانە قورعاۋعا قۇقىعى بار ەكەنىن ەسكە سالۋ. بۇل مەرەكە 1949 جىلى قاراشادا ايەلدەردىڭ حالىقارالىق دەموكراتيالىق فەدەراتسياسى كونگرەسىنىڭ شەشىمىمەن بەكىتىلدى.
